Сөз құдіреті: кітап оқудан қарым-қатынас мәдениетіне дейін

«Кітап оқитын ұлт» республикалық марафоны аясында «OQYRMAN» кітап клубының кезекті отырысы өтті.

Кездесудің қонағы - Н. Погодин атындағы орыс драма театрының жетекші актрисасы, сахна тілі мен актерлік шеберлік пәнінің оқытушысы Ирина Пашкина болды. Ол студенттерге оқу, сөйлеу мәдениеті және қарым-қатынас өнеріне арналған шеберлік сабағын өткізді.

Кездесу барысында адамның не айтатыны ғана емес, оны қалай жеткізетіні де маңызды екені сөз болды. Дикция, интонация, сөйлеу мәнері мен дауыс - жай ғана кәсіби терминдер емес, адамдар арасындағы қарым-қатынастың маңызды құралдары екені атап өтілді.

Сонымен қатар кітаптар туралы әңгіме өрбіп, кітап оқудың сөйлеу қабілетін, ойлау жүйесін дамытуға және өз ойын анық әрі әсерлі жеткізуге қалай ықпал ететіні талқыланды.

Осындай кездесулер кітап клубын ерекше ортаға айналдырады. Мұнда кітап жай ғана мәтін болып қалмай, адамдардың жүздесіп, пікір алмасуына, бір-бірін тыңдауына және өз бойындағы жаңа қырларын ашуына себеп болады.

Алда «OQYRMAN» клубын университетіміздің оқытушылары мен қызметкерлері, мәдениет және өнер саласының өкілдері, сондай-ақ қаламызға танымал тұлғалармен бірге өтетін көптеген қызықты кездесулер күтіп тұр.