28 ақпанда М.Қозыбаев атындағы Солтүстік Қазақстан университетінің Тіл және әдебиет институтында мектеп оқушыларының тіл пәндері бойынша пәндік олимпиадасы өтті. Пәндік олимпиаданың негізгі мақсаттары мен міндеттері: тілге деген ерекше қызығушылық танытқан оқушылар қатарын анықтау. Дарынды балаларға қолдау үшін қажетті жағдайлар жасау. Оқушылардың көпшілік алдында сөйлеу дағдыларын қалыптастыру, кәсіби бағыт-бағдар беру.
Жыл сайын пәндік олимпиадаға қала мен облыстың жалпы білім беретін мектептерінің, лицейлерінің, гимназияларының 10-11 сынып оқушылары қатысады. Биылғы жылы қала мен облыстың 300-ден астам оқушысы олимпиадаға қатысуға өтінім берді. 2 турдан кейін пәндік олимпиаданың жеңімпаздары анықталды. Олар I,II,III дәрежелі дипломдармен марапатталды. Олимпиада аясында жұмыс берушілермен әзірленіп жатқан ПОҚ элективті курстарын талқылау, педагогтарға арналған «Бәсекеге қабілетті түлекті даярлаудың шарты ретінде кәсіби құзыреттілікті қалыптастыру», «Қазақ тілі мен әдебиетінің өзекті мәселелері» атты семинарлар өткізілді.
