Өткен аптада оқу ордамызға ҚР-дағы Бельгия Корольдігінің өкілетті елшісі Мишель Петерманс пен ҚР-дағы Бельгия Корольдігінің сауда жөніндегі өкілі Лейла Әлиева қонақта болды. Құрметті қонақтарды оқу орнымыздың ректоры Оңдасын Әшімов қарсы алды, оларды университет өмірімен, оның білім беру жүйесімен, материалдық базасымен және ғылыми қызметтің бағыттарымен таныстырды. Қонақтар студенттердің шетелдегі оқуларымен айналысатын академиялық ұтқырлық орталығының қызметіне ерекше қызығушылық білдірді.
Ресми кездесудің соңында Оңдасын Бәйкенұлы мен бельгиялық қонақтар естелікке фотосуретке түсіп, СҚМУ мұражайына барып, онда университетіміздің 77-жылдық тарихымен танысты.
Сондай-ақ, делегация еліміздің бірде-бір жоғары оқу орнында теңдесі жоқ астрофизикалық орталықта болып қайтты. дәл осы жерде болашақ астрономдар өздерінің алғашқы қадамдарын бастайды, педагогтермен бірге аспан денелері мен құбылыстарына бірегей зерттеулер жүргізеді.
М.Қозыбаев атындағы СҚМУ-дың материалдық-техникалық базасының күшті екенін айта отыра, құрметті қонақтар жоғары оқу орнымызбен бірлескен қызмет атқаруға дайын екендіктерін айтты.