Осы аптада мемлекеттік білім гранттарын тағайындау конкурсының қорытындысы белгілі болды. Биыл Қозыбаев университетінде бюджеттен қаржыландырылатын орындар саны 797-ге дейін өсті. Оның 300-і педагогикалық мамандықтарды оқытуға бөлінді. 91 грантты «Серпін» бағдарламасына түсуші талапкерлер иеленді.
Мемлекеттік гранттың жеңімпаздарының бірі «Бірінші қалалық жалпы білім беретін IT-лицейі» КММ түлегі Андрей Ударцев болды. «Мектепте оқып жүргенде мен мұғалім болуды армандадым, сондықтан, ҰБТ-ны сәтті тапсырдым. 108 ұпай жинап, грантқа түсемін деген үмітпен Қозыбаев университетіне «Орыс тілі мен әдебиеті» мамандығына құжат тапсыруға келдім. Мен басқа жоғары оқу орындарын да қарастырған жоқпын», - деді Андрей Ударцев.
Сонымен қатар, талапкерлер жергілікті атқарушы органдардан грант ала алады. Оның 50 -і біздің университетке бөлінді. Үміткерлер виртуалды қабылдау комиссиясы, үкіметтің электрондық порталы арқылы немесе университеттің қабылдау комиссиясының техникалық хатшыларының көмегімен де оқуға түсуге өтініш бере алады. Айта кету керек, бүгінгі күнге дейін Қозыбаев университетіне 200-ден аса талапкер құжаттарын тапсырды.
