Қозыбаев университеті Малайзияның Путра университетімен өзара түсіністік туралы меморандумға қол қойды. Селангор штатында орналасқан Путра университеті-Малайзияның жетекші мемлекеттік университеттерінің бірі. 1931 жылы негізі қаланған университетте бүгінде 15 факультет бар және инженерлік, медициналық ғылымдар, гуманитарлық ғылымдар, экономика, менеджмент, білім беру, тілдер және коммуникациялар бойынша бағдарламалар ұсынады. Мұнда 25 000-нанастам студент, оның ішінде 50-ден астам елдерден келген халықаралық студенттер оқиды. Ол QS World University Rankings 2026 рейтингінде 134-ші орында. Путра университетінің өкілдері PhD доктор Лили Нурлияна Абдулла, Азизол Абдулла және Сухайми Пилус университетімізде бір ай болды. Олар студенттерге дәріс оқып, семинарларға қатысты, халықаралық ғылыми журналдарға бірлескен ғылыми мақалалар дайындаумен айналысты.Қонақтар ақпараттық және тарату жүйелерінің, сондай-ақ телематика инженериясының мамандары.  «Осымен университетке екінші рет келіп отырмын. Бұл жолы студенттердің білімдері мен ағылшын тілін меңгеру деңгейлері жоғары. Біз Қайнижамал Ықыласовамен бірге білім берудің икемділігі мен қолжетімділігін арттыру үшін ЖИ технологиясын пайдалана отырып, цифрлық оқыту моделін әзірлеу бойынша ірі ғылыми жобаны қолға алдық», - деді доктор Лили Абдулла.  Екіжақты меморандум екі ЖОО арасында тәжірибе алмасып, өзара әріптестікті дамытуды көздейді. «Бұл біздің ынтымақтастығымыздың жақсы бастамасы. Біздің университет қос дипломдық білім беретін бірлескен бағдарламалар құру мүмкіндігін қарастыруға дайын. Академиялық ынтымақтастықтың үлгісі ретінде: АҚШ-тың Аризона университетімен бес және Қытайдағы Солтүстік-Батыс ауыл және орман шаруашылығы университетімен екі қос дипломдық бағдарламаны жүзеге асырып жатырмыз», - деп атап өтті Ректор Ербол Исақаев. Меморандум тараптардың озық, инновациялық тәжірибелермен бөлісу, ПОҚ және студенттер үшін тағылымдамалар, бірлескен ғылыми-зерттеу және білім беру бастамаларын орнату жөніндегі ниеттерін бекітті.

Жаңа технологиялар, цифрландыру мен ЖИ әсерінен жылдам дамып жатқан еңбек нарығында сала тенденцияларын анықтау және болашақ мамандықтарды болжау, сұранысқа ие мамандарды дайындаудағы маңызды қадам болып табылады.Қозыбаев университеті алаңында  «Солтүстік Қазақстан облысындағы жаңа мамандықтар атласы» атты форсайт сессиясы өтті. Мұнда Қазақстан Республикасы Ғылым және жоғары білім министрлігінің, жергілікті атқарушы органдардың, кәсіпорындардың, колледждер мен жоғары оқу орындарының өкілдері  ашық диалог құрып, жаңа  идеялармен алмасады. Практикалық шешімдер арқылы Солтүстік Қазақстан облысына арналған болашақ мамандықтар атласы әзірленеді. Сондай-ақ, жұмыспен қамтуды жоспарлаудың негізгі құралы ретінде өңірлік жұмыс күшінің қажеттіліктері картасының рөлін күшейту.Аймақ экономикасының ерекшеліктерін және ірі кәсіпорындардың қажеттіліктерін ескере отырып, бұл тәсіл жаңа оқу бағдарламаларына енгізілуі және түзетілуі тиіс болашақ кәсіптерге, дағдылар мен құзыреттерге қойылатын талаптарды әзірлеудің маңызды тетіктерін анықтауға мүмкіндік береді.  Қозыбаев университеті «Мамандығым-Болашағым» бағдарламасының орталығына айналып, осы жерде аймақтық кеңсе ашылды. Мемлекет басшысының тапсырмасымен 2019 жылдан бастап Қазақстан Республикасы ҒЖБМ жүзеге асырып жатқан бұл бағдарлама жаңа кәсіптер мен құзыреттердің салалық атластарын әзірлеуден басталды. Ғылым және жоғары білім министрі Саясат Нұрбек қатысушыларға арнаған бейнеүндеуде аймақ экономикасының даму тенденцияларын талдап, қажетті мамандарды анықтау маңыздылығын атап өтті:– Білім беру мекемелері бұл сұранысқа дер кезінде жауап беріп, жұртшылық Rapid Foresight немесе Skills Technology Foresight әдістемесі арқылы оқытылатын дамудың, білім берудің келешегі зор бағыттары, жаңа мамандықтар туралы түсінік алады. Осы әдістемені пайдалана отырып, қазірдің өзінде жаңа кәсіптердің тоғыз салалық атластары және кадрлық қажеттіліктер картасы деп аталатын бес аймақтық атлас әзірленді. Біз үшін өңірлік университеттерді өңір экономикасы үшін мамандар дайындайтын хаб ретінде орналастыру өте маңызды,- деді министр. Солтүстік Қазақстан облысы үшін атласты дамыту үшін бұрын үш негізгі бағыт белгіленген: ауыл шаруашылығы, құрылыс, өнеркәсіп және машина жасау. Қозыбаев университеті қазірдің өзінде 28 инновациялық білім беру бағдарламасын ұсынып отыр (оның 12-сі 2025 жылы ашылады), дуальды оқыту енгізіліп, өнеркәсіптік PhD докторантура бағдарламасы іске қосылды. «Біздің мақсатымыз – осы талдаулар мен пікір алмасудың нәтижесінде болашақта сұранысқа ие және заманауи кәсіпорындарда жұмыс істей алатын түлектерді даярлау. Сонымен қатар, университетте нақты мамандықтар мен білім беру бағдарламаларын іске қосуды қамтамасыз ету»,- деп атап өтті Қозыбаев университетінің Басқарма Төрағасы-Ректор Ербол Исақаев. Қатысушылар атап өткендей, жаңа кәсіптер, құзыреттер мен дағдыларды игеру үшін облыс экономикасының қажеттіліктерін дәл болжау және жан-жақты зерделеу бүгінгі күннің басты міндеттердің бірі. «СҚО жаңа мамандықтар атласы» атты форсайт сессиясының қорытындысы бойынша 23 білім беру бағдарламасын жүзеге асыру бойынша ұсыныстар әзірленді. Біздің өңіріміздегі сұранысқа ие мамандықтарға: жасыл құрылыс инженері, киберқауіпсіздік  жөніндегі маманы, ҰҰА маманы, өндірістегі химиялық заттарды бақылау жөніндегі маман, ЖИ инженері және т.б. кіреді.

Петропавлда көшелерді абаттандыру мен көгалдандыруға бағытталған «Таза Қазақстан» ауқымды экологиялық акциясы өтті. Бастамаға Қозыбаев университетінің ұжымы да қосылды. Іс-шараға ЖОО-ның 300-ге жуық қызметкерлері мен студенттері қатысты. Қатысушылар студенттік қалашықта тазалық жұмыстарын жүргізіп, нәтижесінде 1 тоннаға жуық қоқыс жиналды. Сондай-ақ, акция аясында М. Жұмабаев атындағы саябақта Солтүстік Қазақстан облысы әкімінің қатысуымен 100 ағаш отырғызылды. Мұндай іс-шаралар экологиялық мәдениетті қалыптастыруға ықпал етіп, жастардың жауапкершілігін арттырады. Қозыбаев университеті дәстүрлі түрде қоршаған ортаны сақтауға және жастар арасында экологиялық сананы дамытуға бағытталған бастамаларды қолдайды.

Осы жолы SKO Hub мамандары Қозыбаев университетінде қос дипломдық бағдарлама бойынша оқитын студенттерге AI-воркшоп шарасын өткізді. Қатысушылар IT  заманауи технологиялардың қалай қолданылатынын білді, генеративті ЖИ құралдарымен танысты. SKO Hub облысымызда стартап жобалар мен білім беру бағдарламаларын әзірлеп, жасанды интеллект енгізумен айналысады. Олар білім алушыларды хаб қызметімен таныстырып, бағдарламалар мен стартап жобаларға қатысуға шақырды. Сондай-ақ, нейрожелілерді күнделікті және шығармашылық тапсырмаларда қалай қолдануға болатынын көрсетті. SKO Hub мамандарының айтуынша, апта сайын  IT, дизайн және стартап жобалары бойынша пайдалы тренингтер өткізіледі. «Біз Astana Hub филиалымыз. SKO Hub «Qyzyljar» креатив орталығында орналасқан. IT саласы мен басқа да салалар бойынша білім алатын студенттер бізге келіп, өз шеберліктерін шыңдап, іс-шаралар мен түрлі үйірмелерге қатыса алады.Немесе өз клубтарын да құра алады»,- деді СҚО IT-хаб өңірлік директоры Нұргүл Булатова Кездесу соңы зияткерлік ойынымен аяқталды. Мұнда студенттер өздерінің ЖИ озық дағдыларын көрсетіп, SKO Hub брендтік сыйлықтарына ие болды.

Біз Ресейдің оқу орындарымен ынтымақтастықты дамытудамыз. Университетімізге Қорған облысының делегациясы келді. Олардың құрамында, білім және ғылым департаментінің өкілдері, Қорған мемлекеттік университетінің ректоры, колледждер мен техникумдардың директорлары болды. Қонақтар жаңа оқу зертханалық корпустың агротехнология және медицина саласындағы заманауи зертханаларын, бейне жазба студиясы мен Қытайдың Солтүстік-Батыс ауыл және орман шаруашылығы университетінің қытайлық серіктестерімен бірлесіп ашылған зертханаларын аралады. Басқарма Төрағасы – Ректор Ербол Исақаев университеттің қызметі, білім беру бағдарламалары, ғылыми зерттеулері, Аризона университетімен ауқымды ынтымақтастық жобасы, халықаралық серіктестіктер туралы бөлісті. Сондай-ақ, Қозыбаев университетіне жергілікті билік тарапынан жоғары қолдау көрсетіліп жатқанын атап өтті. СҚО әкімінің орынбасары Жүсіп Жұмағұлов университеттің аймақтық жобаларды ғылыми қолдауына және «Жаңа кәсіптер атласы» аясындағы білім беру бағдарламаларына ерекше тоқталды.Қорған қаласының білім және ғылыми ұйымдарымен ынтымақтастықтың әлеуетті бағыттары анықталды:- студенттер мен оқытушылардың сапарлары мен алмасуы, тағылымдамадан өту;- бірлескен ҒЗТКЖ;- зертханалар, ғылыми-зерттеу және инженерлік орталықтар құру;- технологиялар трансферті және коммерцияландыру;- білім, ғылым және инновация салаларындағы стратегиялық серіктестікті дамыту. Қонақтар алдағы уақытта да ынтымақтастыққа дайын екендіктерін білдірді. «Сіздердің ЖОО-ның үлкен артықшылығы – ауылшаруашылық тауар өндірушілерімен, медициналық ұйымдармен ынтымақтастық орнатуы болып табылады. Облыстың дамуы үшін ауқымды жұмыс атқарасыздар. Алдағы уақытта, достық қарым-қатынас орнатуға үміттенеміз. Университет басшылығымен , екі тарапты да қатты қызықтыратын білім беру туризмі тұжырымдамасын талқыладық.Сондықтан мұндай сапарлар студенттерді, колледж оқытушыларын және мектеп оқушыларын қызықтырады. Бұл алмасу бізге өз саламыздың кәсіби мамандарын дамытуға мүмкіндік береді»,-деп бөлісті Қорған облысының білім және ғылым департаментінің директоры Андрей Кочеров

ЖОО- да жастар арасында қаржылық сауаттылықты арттыру және «Fin IQ»республикалық қаржы диктантына дайындық бойынша ауқымды жұмыс жүргізілді. Оның шеңберінде Солтүстік Қазақстан облысы бойынша Экономикалық тергеу департаментінің өкілдері студенттермен кездесу өткізді.ҰББ жетекшісі Виктория Алпеева студенттерге алаяқтықтың негізгі схемалары, қаржы пирамидалары туралы егжей-тегжейлі айтып берді, сондай-ақ, цифрлық технологиялар мен қаржы әлемінде болып жатқан процестерді түсінуге көмектесетін құнды кеңестермен бөлісті. Жалпы республикалық диктанттың мақсаттары мен міндеттері талқыланды. 500-ге жуық студент іс-шараға жоғары қызығушылық танытып, талқылауға белсенді қатысты.

Маңғыстау облысының Еңбек мобильділігі мен мансап орталығының өкілдері Қозыбаев университетінің студенттерімен кездесті. Олар Ерікті қоныс аудару бағдарламасы мен жұмыспен қамту жөнінде түсіндірме жұмыстарын жүргізді. Іс-сапармен келген делигация бағдарлама аясында солтүстік өңірдегі бос жұмыс орындарын анықтау, бұрын қоныс аударған отбасылармен кездесіп, алда қоныс аударуға ниет білдірген отбасыларға қолдау көрсету мақсатында келіп отыр. Қозыбаев университеті осы бағыт бойынша Маңғыстау өңірінен үшінші жыл қатарынан студенттерді қабылдайды. Басқосуда ЖОО басшылық құрамы университеттің білім беру бағдарламалары мен Маңғыстау облысынан келген студенттердің өмірі мен білімі туралы ақпарат берді. «Қазіргі таңда университетімізде батыстан 50-ге жуық балалар білім алады. Маңғыстау облысына нақты білім беру бағдарламалары бойынша квоталық гранттар бөлінді. Университетіміз жылына екі рет осы облыстың мектептері мен оқу орындарына кәсіптік бағдар жұмыстарын жүргізеді»,- деп Академиялық мәселелер жөніндегі Басқарма мүшесі Айгүл Нурпеисова бөлісті. Еңбек мобильділігі орталығынң директоры Улбазар Орынбаеваның айтуынша, көші-қон саясаты міндетті түрде керек. Солтүстік өңірде ауыл және мал шаруашылығын қолға алуды ниеттенген азаматтарға мал басын көбейтуге қолайлы жағдай жасалған: «Қозыбаев университетінің студенттерге беріп жатқан мүмкіндіктері жоғары. Себебі екі диплом алып шығу мүмкіндігі көптеген басқа ЖОО-да қарастырылмаған. Солтүстіктің табиғаты қолайлы. Сондықтан білім алушыларға осы аймақта қалып, жұмыс істеп, өз шаруашылықтарын басқаруға мүмкіндік береді. Мұнайлы,Бейнеу аудандары сияқты халық көп шоғырланған жерлер бар. Енді осы аймақтарға кәсіптік бағдар беру жұмыстарын жүргізіп студенттер мен оқушыларды тартамыз. Бүгін кездесуде білім алушылардың ұсыныстарын да тыңдадық». Келген қонақтар оқу зертханалық корпусы мен 1200 орындық жаңа жатақхананы аралап, студенттердің тұрмыстық жағдайымен танысты.

Қозыбаев университеті «Сапаны қамтамасыз етудің жаһандық сын-қатерлері және желілік шешімдердің күші» атты халықаралық вебинарға қосылды. Іс-шараны ASIIN озық тәжірибе университеттерінің жаһандық желісі ұйымдастырды. Оған ASIIN беделді неміс агенттігінің аккредитациясынан өткен әлемдік жоғары оқу орындары кіреді, бұл білім беру сапасының жоғары деңгейін көрсетеді.  Айта кетейік, біздің ЖОО-да инженерлік және IT бағыттағы 6 білім беру бағдарламасы ASIIN аккредитациясын алды.Халықаралық вебинардың спикерлері ASIIN Директорлар Кеңесінің Президенті Клаус Кройулич, Мюнхен қолданбалы ғылымдар университетінің вице - президенті, профессор, доктор Мартина Циммерманн болды. Олар дуальды білім беру мен ғылыми деректерді заманауи басқару бойынша тәжірибелерімен бөлісті. Германияда студенттердің шамамен 4% - ы дуальды бағдарламаларда оқиды, ал олардың барлық білім беру бағдарламаларындағы үлесі шамамен 9% құрайды. Сонымен қатар, дуальды білім берудің сапасы университеттер мен серіктес ұйымдарға да байланысты: олар оқытудың жоғары стандартын қамтамасыз етуі керек. Сондықтан мұндай ұйымдарға қойылатын нақты талаптарды алдын-ала анықтау өте маңызды. Ғылыми мәліметтермен жұмыс істеуге ерекше назар аударылды. Бүгінгі таңда бұл ғылымды дамытудың кілті: деректерді сақтау мен бөлісудің сенімді жүйелерін құру арқылы зерттеулерді қайталанатын және халықаралық ынтымақтастыққа ашық етуге көмектеседі.Біздің ЖОО осындай кездесулерге қатысу арқылы тәжірибе алмасуға, әлемдік сарапшылардан үйренуге және университеттің жаһандық білім беру кеңістігіндегі орнын нығайтуға көмектеседі

Қозыбаев университетінде Huawei Technologies Kazakhstan компаниясы ұйымдастырған Huawei ICT Competition 2025-2026 Roadshow ауқымды білім беру іс-шарасы өтті. Кездесу барысында компанияның таланттар экожүйесін дамыту жөніндегі менеджері Сымбат Советхалықова студенттерге Huawei-дің жаһандық білім беру бастамалары мен Қазақстандағы қызметі туралы ақпарат ұсынды. Басқа елдердің балаларымен қатар еліміздің студенттері де қатыса алатын Huawei ICT Competition 2025-2026 халықаралық байқауына ерекше назар аударылды. Ол білім алушылардың ақпараттық-коммуникациялық технологиялар саласындағы дағдыларын дамытуға және network, Computing және Cloud track бағыттарын қамтиды.Студенттер Huawei бастамаларына белсенді қызығушылық танытты. Ақпараттық сессиялардан басқа, байқау аясында жүлделер мен сыйлықтар ұтыс ойындары ұйымдастырылды. Айтып өткен жөн, 2024 жылдан бастап біздің университетте Huawei академиясы жұмыс істейді. Ол студенттерге сапалы білім беру ресурстарына, практикалық тапсырмаларға және сертификаттау мүмкіндіктеріне қол жеткізуге мүмкіндік береді. Өткен оқу жылында жоғары оқу орны Академиясының барлық студенттері AI-Sana жобасы аясында Huawei Talented платформасында жасанды интеллект бойынша курстардан 100% табысты өтті. Бұл көрсеткіш олардың цифрлық технологиялар саласындағы құзыреттерін қалыптастырудағы маңызды қадам болды.

Университетіміз екі атаулы мерекені ҚР Жоғары білім беру қызметкерлері күні мен Халықаралық қарттар күнін атап өтті. Оқытушылар студенттерді  жауапкершілікке, шешім қабылдауға,  қамқорлыққа үйретеді. Қазіргі таңда жоғары оқу орнымызда 110 зейнеткер, 400-ге жуық ПОҚ еңбек етеді. Мерекелік шараның құрметті ардагерлері еліміздің жоғары білім беру жүйесін құруға және дамытуға өлшеусіз үлес қосып келеді. Қадірлі қонақтарға құрмет көрсетіліп, жылы құттықтаулар айтылды.  Салтанатты шарада университеттің сапалы маман тәрбиелеу жолында аянбай еңбек етіп жүрген бірқатар қызметкерлері сахна төрінен көрініп, ҚР ҒЖБМ, ҚР Білім министрлігінің және СҚО әкімінің лайықты марапаттарын алды. Профессор Александр Демьяненко «Ғылымды дамытуға сіңірген еңбегі үшін» төсбелгісімен марапатталды. «Тіл жанашыры» құрмет дипломын аға оқытушы Рахмет Күләйхан мен Foundation деканы Гүлбарам Хамзина алды. Жиынға профессор-оқытушылар құрамы, университет қызметкерлері мен  білім алушылар қатысты.  Мерекелік шара концерттік бағдарламамен қорытындыланды.Еңбектеріңіз әрқашан бағаланып, алғысқа толы болсын. Шәкірттеріңіз биік асуларды бағындырсын. Игі істеріңіз жаңа табыстар әкелсін.Адал әрі әділ еңбектеріңіз үшін рахмет!