Study Arizona бағдарламасына іріктеу нәтижелері (Күз 2026)

Құрметті студенттер!

Kozybayev University мен The University of Arizona бірлескен комиссиясы 2026 жылдың күзіндегі Study Arizona семестрлік бағдарламасына қатысатын студенттерді іріктеу үдерісін аяқтады.

Іріктеу ашықтық, академиялық адалдық және квоталарды әділ бөлу қағидаттарына негізделді. Бағалау екі тараптың бірлескен және толықтай тәуелсіз түрде жүргізілді. Әрбір тарап бағалауды өз академиялық талаптары мен контекстіне сәйкес жүргізді, ал академиялық емес критерийлер бойынша қорытынды балл NKU және U of A комиссиялары анықтаған ұпайлардың жиынтығы ретінде анықталды.

Біз әр білім беру бағдарламасы бойынша барлық критерийлерге қатысты егжей-тегжейлі балл бөлу мен әр қатысушыға арналған жеке кері байланысты қамтитын ранжирленген тізімдерді дайындадық.

Бағалау жүргізу тәртібі

Бұл кезеңнің әрбір үміткер үшін айрықша маңызды екенін ескере отырып, бағалау әдістемесіне қосымша егжей-тегжейлі түсіндірме ұсынамыз. Студенттердің қорытынды рейтингі 100 балдық бағалау шкаласы бойынша есептелген жиынтық балл негізінде айқындалды.

Іріктеудің негізгі қағидаты – кешенділік. Қорытынды шешім тек академиялық үлгерім көрсеткіштерімен шектелмей, үміткердің төрт негізгі көрсеткіш бойынша жан-жақты бағаланған профиліне сүйене отырып қабылданды: GPA (ең жоғары 30 балл); мотивациялық эссе (ең жоғары 30 балл); портфолио (ең жоғары 20 балл); оқытушылардың бағалауы/ұсынымы (ең жоғары 20 балл).

Келесі қадамдар

Сіздерге жолданған бағалау кестелерінде сіздің қорытынды мәртебеңіз көрсетілген. Иеленген орынға байланысты келесі әрекеттерді орындауыңыз қажет:

1-10 орын алған студенттер (Approved) – Сіз Study Arizona бағдарламасына қабылдануға ресми түрде ұсынылдыңыз! Сіздің әрекеттеріңіз: құжаттарды рәсімдеу және сапарға дайындық процесін дереу бастау. Міндетті талап – төлқұжаттың болуы; егер ол болмаса, оны шұғыл түрде рәсімдеу. Біздің Location Manager Альбина Рашидқызы 1 маусым, дүйсенбі күннен бастап сіздермен жұмысты бастайды.

11-12 орын алған студенттер (Waitlist) – Сіз ресми резервтік үміткерлер тізіміне енгізілдіңіз. Түсіндірме: резервтік тізім негізгі құрамдағы (1-10 орын) үміткерлердің қатысудан бас тартуы, виза берілмеуі немесе өзге де объективті себептерге байланысты кедергілер туындаған жағдайда іске қосылады. Сіздің әрекеттеріңіз: резервтік мәртебеге қарамастан, барлық құжаттарды негізгі құраммен бір мезгілде толық рәсімдеуді дереу бастау қажет. Орын босатылған жағдайда ауыстыру жедел түрде жүзеге асырылады. Дайын құжаттар пакеті бюрократиялық кідірістер салдарынан мүмкіндікті жіберіп алмауға кепілдік береді. Альбина Рашидқызы сіздермен де 1 маусымнан бастап жұмысты бастайды.

12-орыннан кейінгі үміткерлер (Pending) – негізгі құрам (1-12 орын) бойынша іріктелген студенттерді рәсімдеу барысында форсмажорлық жағдайлар туындаған жағдайда сапарға қатысу мүмкіндігін сақтайды. Қажет болған жағдайда кезек бекітілген рейтингке сәйкес қатаң тәртіппен алға жылжиды.

Барлық қатысушыларға жоғары деңгейдегі дайындықтары мен атқарған жұмыстары үшін алғыс білдіреміз, сондай-ақ алдағы оқу үдерісінде және болашақ академиялық жобаларда табыс тілейміз!

Үміткерлер тізімі