Ал, оқу жүктемесі 900-ден 680 сағатқа дейін төмендейді. Бұл жаңа білікті кадрларды тартуға оң септігін тигізеді. Алайда, ПОҚ-қа қойылатын талаптар да артады. Университетке жұмысқа қабылдау кезінде рецензияланған ғылыми журналдарда мақалалардың болуы, педагогикалық процесске жаңа білім беру технологияларын енгізу ескеріледі. Сондай-ақ, оқытушылардың біліктілігін арттыруды жүзеге асыру, ЖОО кітапханасын жаңа оқулықтармен, электрондық кітаптармен толықтыру жоспарланған. Мұның бәрі жаңа оқу жылынан бастап білім беру қызметтерінің сапасын жақсартуға мүмкіндік береді. Осындай жаңғыру кезінде Қозыбаев университеті студенттерінің оқу ақысы бұрынғы деңгейде қалуы мүмкін емес.
Бұрын кей мамандықтардың оқу құны жылына бар-жоғы 145 мың теңге болатын. Айта кеткен жөн, бұл сомма 1 студенттің оқу шығындарын өтей алмайды. Ал, әрбір мемлекеттік грант үшін, республикалық бюджеттен 990 мың теңге бөлінеді. Сондықтан, директорлар кеңесі қашықтан оқыту технологиясын қолдана отырып, бакалаврларды оқытудың ең төменгі құнын 270 мың теңге деңгейінде белгіледі. "Университет студенттердің шығындарының өсуін түсіне отырып, төлемнің икемді мүмкіндіктерін, соның ішінде бөліп төлеуге де рұқсат берілмек,- деді Басқарма Төрағасы-Ректор Ерлан Шуланов. Бұл ретте ҚР заңнамасында университеттерде сырттай немесе толық қашықтан оқыту форматы көзделмеген. Қашықтан оқыту технологиясын қолдана отырып оқитын студенттер альма-матер қабырғасында өткізілетін сабақтарға кем дегенде аптасына бір рет қатысуы керек. Біреуі күн сайын келемін десе, енді біреуіне кешкі оқыту форматы ыңғайлы болып отыр. ЖОО студенттердің қажеттіліктерін ескере отырып, осы шарттардың барлығын сақтауға дайын".
Толық күндізгі оқу форматының төлемі шамамен 440 мың теңгені құрайды. 90% студенттердің оқуы орташа есеппен 50-60 мың теңгеге көтерілді. Бүгінде Қозыбаев университетінде бакалаврлардың 45%-ы ақылы негізде оқиды. Магистратура мен докторантурада оқу құны өзгермейді.