Нұр-Сұлтан қаласында қашықтан онлайн форматта «Үздік педагог 2021» атты IІІ халықаралық педагогикалық байқау өтті. Конкурс халықаралық Білім және Ғылым Академиясының ұйымдастыруымен биыл 3 рет жарияланған болатын.
Аталмыш сайыс ҚР Тәуелсіздігінің 30 жылдығына орай «Болашаққа бағдар- «Рухани Жаңғыру» бағдарламасы аясында өткізілді. Бұл байқау заманауи педагогикалық тәжірибені жетілдіріп және оны жүзеге асыру үшін педагогтардың зерттеу, шығармашылық, кәсіби әлеуетін жандандыру. Сондай-ақ, ғылымға қызығушылықтарын танытып, білім беру қызметкерлерінің педагогикалық тәжірибесін таныстыру мен педагогтарды білім беру үдерісінде ақпараттық коммуникациялық технологияларды белсенді пайдалануға ынталандыру мақсатында ұйымдастырылады.
Байқауға Қазақстан, Ресей, Белорусь, Тәжікстан елдерінің белсенділері ат салысты. Сайысқа жалпы 350 үміткер қатысуға ниет білдірді. Қатысушылар презентациялық жұмыстары мен мақалаларын ұсынды. Біліктілер мен білімділер бақ сынасқан додада Қозыбаев университетінің «Журналистика» кафедрасының меңгерушісі Айсұлу Шайкенова «Үздік сабақ жоспары» номинациясы бойынша топ жарып, гран-приді жеңіп алды.
Университет үшін абыройлы жеңісімен әріптесімізді шын жүректен құттықтаймыз! Талабыңыз мен талантыңыз одан әрі шыңдалып, биіктерден көріне беріңіз деп тілейміз!