Қозыбаев университеті «Парасат» газетін 1996 жылдан бастап шығарады. Сондай-ақ, әр апта сайын облыстық телеарнада екі тілде шығатын бағдарлама оқу ордамыздың жаңалықтары туралы хабар таратады. Бұған дейін университеттік БАҚ шығарумен Медиаорталықтың қызметкерлері айналысқан еді. Енді, бұл жұмысқа журналистика кафедрасы жетекшілік етпек.
Іскерлік салада қалам тербеп жүрген болашақ журналистер үшін бұл тәжірибе оқу үрдісіне енгізілген. Білім алушылар өз шеберліктерін шыңдап, кәсіби дағдыларды тереңірек игере алады. Осы аптада Қозыбаев университетінде мамандандырылған кеңсе ашылды, онда студенттер ақпараттық материалдарды жазу, мәтіндерді өңдеу, бейнекамерамен жұмыс жасап, монтаждауды үйренеді. Сонымен қатар, студенттер тілші, редактор немесе оператор ретінде өздерін сынап көре алады.
Бүгінде кафедрада «Журналистика» және «PR-журналистика» білім беру бағдарламалары бойынша бакалавр мен магистратурада мамандарды даярлайды. Қазіргі таңда кафедраның жүздеген түлегі облыстық, республикалық және шетелдік бұқаралық ақпарат құралдарында, баспасөз қызметтерінде, жарнама агенттіктерінде және т.б. қызмет орындарында еңбек етіп келеді.
