Аризона университетінің делегациясы СҚО-ға жұмыс сапарымен келді. Америкалық әріптестер университет басшылығымен стратегиялық серіктестік мәселелері бойынша кездесті. Қос дипломды жобаларды іске асыру үшін екі университетте де ұқсас білім беру бағдарламаларының болуын талқылады.
Естеріңізге сала кетсек, ҚР Білім және ғылым министрлігі және екі жоғары оқу орны арасында ынтымақтастық туралы үшжақты келісімге қол қойылған болатын.
Қозыбаев университетінің қызметімен, оның инфрақұрылымымен және ПОҚ-мен жақынырақ танысу үшін шетелдік проректорлар, декандар, ғылыми мектептер мен департаменттердің директорлары, АҚШ профессорлары біздің ЖОО факультеттерінің жұмысымен, Foundation дайындық бөлімімен танысты.
Бұған дейін шетелдік меймандар "Қызылжар Су" ЖШС, "AgroLab" агрохимиялық зертханасына, "Зенченко және Ко" КС сүт зауытына барып, студенттердің практикалық дағдыларын шыңдай алатын орындарды көрді. Индустрия өкілдерімен әңгімелесіп, олардың жас мамандар мен кадрларды даярлауда қандай талаптар бар екенін анықтап көрдік. Қазір біздің білім беру бағдарламаларымыз Аризона университетімен қалай үйлесетінін түсіну маңызды", - деп атап өтті Басқарма төрағасы-ректор Ерлан Шұланов.
Сондай-ақ, меймандар зертханалық базамен, ғалымдарымыздың жобаларымен танысты, инвестициялар тарту және ЖОО-ны жаңғырту жолдарын қарастырды. Сонымен қатар, түлектердің қос дипломды білім бағдарламаларына және Foundation дайындық бағдарламасына түсу мәселелерін талқылау үшін облыс мектептерінің директорларымен кездесулер өткізілді.
