Ұлттық мәдени құндылықтарымызды арттыруға сүбелі үлес қосып жатқан музыка өнерінің тарландарының бірі «Tұран» ансамблі.
Жетіген, қобыз, сазсырнай, шан қобыз, қылқобыз саз аспаптарын серік еткен «Тұран» ансамблінің тарихы 2008 жылдан бастау алады. Бүгінде шығармашылығын Берлин, Нью-Йорк, Париж сынды әлемнің түкпір елдерінде ұсынған ансамблге 13 жыл. Осы уақыт аралығында 70-тен астам елде өнерлерін көрсетіп үлгерді. Олар қазақ халқының ертеден бері келе жатқан төл дәстүрін терең меңгеріп, екі нақты жанрды симфония мен халық музыкасын біріктіріп, ұмыт бола бастаған ұлттық аспаптардың сүйемелдеуімен күй-жырларды жаңғыртып жүрген бірегей топ.
Шығармашылық кездесуде қазақ композиторлары мен ансамблдің авторлық шығармалары орындалды. Білім алушылар ансамблдің күйтабақтарына енген «Ер Тұран» «Қазақ елі», т.б туындыларды тыңдап, топ шығармашылығымен жақынырақ таныса алды. Қазіргі таңда ұжымның репертуарында 40-тан аса туынды бар.
Іс-шараның негізгі бағыты қазақ музыкалық өнерінің фольклорлық түрін көрсету арқылы жастарға қазақ халық өнерін насихаттау, музыка мәдениетін дамытуға арналған. Университетіміздің студенттерімен ашық сұхбат өткізген өнер қырандары музыкалық орындаудың ұлы шеберлігін көрсетіп қана қоймай, ұлттық аспаптардың шығу тарихы туралы әңгімелеп берді.
