Жақында универсетімізге Түркия мен Болгариядан профессорлар келгені туралы хабардар еткен едік. Олар болашақ орман шаруашылығы мамандарымен және филологтармен белсенді жұмыс істеп келеді. Енді, «География» және «Агрономия» мамандықтарының білім алушылары да шетелдік ғалымдардан білім алмақ. Оларға дәрістер осы аптадан оқыла бастайды.
Палермо итальяндық университетінің профессоры Джузеппе Ло Папа Агротехнология факультетінде сабақ береді. Ал, Румынияның А.И. Кузы атындағы Яссы университетінен Дорин Лозовану математика және жаратылыстану факультетінде дәріс оқиды.
Айта кеткен жөн, Дорин Лозовану біздің университетке екінші рет келіп отыр. Өткен сапары 2019 жылы болған еді. Ол Молдованың география және этнология қауымдастығын басқарып, Ресей, Румыния және Сербиядағы бірқатар ғылыми ұйымдарының мүшесі. Гагаузия атласының және Молдова, Украина, Оңтүстік-Шығыс Еуропадағы көптеген этникалық карталардың ғылыми редактор. 60-тан астам ғылыми жарияланымның авторы.
Джузеппе Ло Папа 2011 жылдан бастап Палермо университетінің ауылшаруашылық және орман ғылымдары факультетінің зерттеушісі және профессоры. Teagasc (Ирландия) ғылыми қызметкері болды, Сицилияның қоршаған ортаны қорғау агенттігінде сарапшы болып жұмыс істеген.
Шетелдік оқытушылар білім мен ғылыми тәжірибенің осыншама маңызды жүгін біздің білім алушылармен бөлісетіні тамаша жаңалық! Айта кетейік, шетелдік мамандар ҚР Білім және ғылым министрлігінің Қазақстандағы жоғары оқу орындарына шетелдік ғалымдарды тарту бағдарламасы аясында университетке келді.
