Қазақстандық «TenQogam» мобильді қосымшасы мүгедектігі бар адамдарға арналған. Оның көмегімен осы топқа жататын жандар үшін ұсынылып жатқан жеңілдіктер, әлеуметтік қызметтер, кеңес алуға, веб-дизайн, тігін ісі бойынша курстардан өтуге, онлайн-тренингтерге қатысуға болады. Сондай-ақ, қоңырау шалу арқылы инватакси, дәрі-дәрмек жеткізу және азық-түлік өнімдеріне тапсырыс беруге болады. Тағы бір атап өтетін жайт, жұмыспен қамту, мүгедектер құқығы сынды онлайн сервистер, жеке бизнесті бастау және оны тіркеу сынды қызмет түрлері қарастырылған. Мұның бәрі мүмкіндігі шектеулі жандар үшін таптырмас көмек.
Бұл туралы «TenQogam» мобильдік қосымшасының авторы «АРДОС-Жүрек» мүгедектер бірлестігі ЗТБ директоры Ақжан Кәрім осы қосымшаның демо-нұсқасының таныстырылымында айтып берді. «Пандемия мүгедектігі бар адамдардың ақпараттық вакуумда екенін көрсетті. Бұл портал барлық санаттағы адамдар мен олардың жақындары үшін пайдалы. Ол қазақ және орыс тілдерінде болады, сондай-ақ, зағип адамдарға арналған нұсқаны да ұсынатын боламыз. Өйткені, бұл топқа жататын адамдар үшін қосымшалар өте аз. Компьютер арқылы пайдалану үшін де қосымша сайт іске қосылады. Пилоттық жобаны әзірге тек СҚО үшін App Store және Play маркеттерінен жүктеп алуға болады. Болашақта оны барлық қазақстандықтар үшін қолжетімді етуді жоспарлап отырмыз», - деді Ақжан Кәрім.
Солтүстік Қазақстан облысында 26 мыңнан астам мүгедек азамат тұрады. Жоба «Шеврон» компаниясымен және Орталық Азияның Еуразия Қорының қолдауымен жүзеге асырылды. Қосымшаның таныстырылымына Қозыбаев универстетінің студенттерін мен өңір белсенділері қатысты. Бүгінгі таңда, ЖОО-да 50-ге жуық мүмкіндігі шектеулі бала білім алып жатыр. Болашақта әзірлеушілер студенттерді жобаны жүзеге асыру үшін тартуды жоспарлап отыр. Сондай-ақ, қосымшаны пайдаланушылар тобынан кері байланыс алып, жобаны одан әрі жақсы жұмыс істеуі үшін түзетулер енгізбек.
