Қазақстан Республикасы Тәуелсіздігінің 30 жылдығы қарсаңында университетіміздің профессоры, академик, Қазақстанның еңбек сіңірген қайраткері Зарқын Тайшыбайдың «Абылай хан тарихы» атты 3 томдық ғылыми еңбегінің тұсаукесері өтті.
Шараға СҚО әкімінің орынбасары Ғани Нығыметов, Басқарма Төрағасы-Ректор – Ерлан Шұланов, Басқарма Төрағасы - Ректор кеңесшісі Ақмарал Ыбыраева облыстың құрметті азаматтары мен шаһар зиялылары, ЖОО студенттері мен профессорлық оқытушылар құрамы қатысты.
Соңғы он жылда абылайтану мәселелерімен үзбей айналысқан академик, Республиканың мерзімді баспасөздеріне, электронды ақпарат көздері арқылы 300-ге тарта ғылыми мақала жариялады. Абылай ханның өмірі мен қызметіне байланысты Ресей және Қытай мемлекеттік архивтерінен тың деректер тапты, оларды ғылыми талаптарға сай салмақты тақырыптарды саралап, жариялады.
Автордың айтуынша, мұндай тарихи дүниені жазу оңайға соқпайды. «Аталмыш кітапты жарыққа шығару үшін 30 жылға жуық еңбектендім. Абылай ханға қатысты тарихты жан-жақты зерттедім. Әрбір қазақтың жүрегінде 300 жыл бойы жарқырап тұрған Абылай ханның бейнесі бар. Менің мақсатым Абылай сұлтанның өмір жылдары туралы екі ғасыр бойы жаңсақ қабылданып келген мәліметтерді нақтылау. Абылайдың өміріне байланысты зерттеу еңбектері мен шежіресі осы 3 томға жинақталған», - дейді профессор Зарқын Тайшыбай.
Жиынға қатысқан «Солтүстік Қазақстан мемлекеттік архивінің» директоры Сәуле Мәлікова: «Қазақ халқының ұлы ханы, тәуелсіздікті қамтамасыз еткен Абылай туралы жарық көрген үлкен еңбекке куә болып отырмыз. Абылай туралы құжаттар баршылық. Бұл жарық көріп отырған 3 томдықта Абылай хан туралы ресми деректердің ең құндылылары рет-ретімен жүйелі түрде топтастырылған. Бұл ретте автор Зарқын ағаның еңбегі өлшеусіз», - деп атап өтті. Сондай-ақ бірқатар зиялы қауым өкілдері туынды туралы өздерінің жылы лебіздерін білдірді.
Кітапқа тарихи оқиғалар жөнінде XIX ғасырдың басынан бері, осы уақытқа дейін жарық көрген кеңес зерттеушілерінің пікірлері қайта қаралып, ғылыми тұрғыда түзету енгізілген. Абылай ханның кезеңін қамтитын 1 мыңнан аса құжат қолданылған. Ғылыми еңбекте Абылайдың ерліктері, мемлекет қайраткері ретіндегі қызметі оның кезіндегі Қазақ хандығының ішкі және сыртқы саясатын тұңғыш рет жан-жақты ғылыми зерттеу нысаны ретінде алынып, жазба құжаттар негізінде салыстырылып талданған. Абылай ханның өмірі мен қызметіне арналған құжаттар жинағы алғаш рет 2000 дана болып басылып шыққан. Айта кетейік, бұл 3 томдық еңбек қазақ тарихында тұңғыш рет шығып отыр.
