«Сұңқар» спорт клубының ұйымдастыруымен «Cергектік пен денсаулық» спартакиадасы– университет оқытушылары мен қызметкерлері арасында өткізілетін дәстүрлі дода. Оған университеттің барлық факультеттері қатысты. Мақсат – саламатты өмір салтын қалыптастыру.
Жарысты ЖОО Тәрбие жұмысы және әлеуметтік мәселелер жөніндегі Басқарма мүшесі Ақмарал Тұрғалеева ашып, командаларға сәттілік тіледі.
Қатысушылар шахмат, волейбол, жүзу, шағын-футбол, дартс, тоғызқұмалақ және арқан тартыс ойындарында өзара мықтыны анықтады. Факультеттерде командалар құралып, спартакиада алдында үлкен дайындықтан өтті. Қатысушылар саны да жыл санап артуда, биылға жарысқа 70 әуесқой спортшы, барлық факультеттерден іріктелген 7 құрама бақ сынасты. Сайыс бір аптаға созылды.
Тартысты бәсекеде құрамалар бар шеберліктерін көрсетіп, қызу ойын болды. Екі жақты шабуылдар жасалып, қорғанысқа шыққан қатысушылар өз командалары үшін аянып қалған жоқ. Осылайша волейболдан Әкімшілік басқару қызметкерлері топ жарды. Интеллектуалды ойыннан дес бермеген шахмат майталмандары МЖҒФ жүзуден де 1 орынды жеңіп алды. «Бақ шаба ма, бап шаба» демекші, арқан тартыс, дартс және шахматтан 1 орынға ИСТФ лайықты деп танылды . Қарсыластарының мықтылығына қарамастан Агротехнологиялық факультеті ойыншылары тоғызқұмалақтан 1 орынға табан тіреді.
Ал, жалпы командалық есеп бойынша жүлделі үшінші орынды ТЭҚФ қызметкерлері қанағат етсе, екінші орынды МЖҒФ мамандары меже тұтты, бірінші орынды ИСТФ қызметкерлері жеңіп алды. Барлық жеңімпаздар мен қатысушылар грамоталармен және бағалы сыйлықтармен марапатталды.
