Жыл сайын бір шаңырақ астында халқымыздың мәдени мұрасымен дәстүр мәселелерін талқылау мақсатында мектеп оқушылары мен ұстаздар қауымы жиналады. Биыл «Қазақ халқының мәдени мұрасы мен салт-дәстүрлерінің заманауи ғылыми зерттеулері: мектеп ғылымы» IV халықаралық онлайн конференциясы ұйымдастырылды. Осы жолы кездесуде қатысушылар қазақ халқының салт-дәстүрлерінің жаңашылдылығымен таныстырып шықты.
Жалпы конференцияны аша отырып, университетіміздің «Практикалық қазақ тілі» кафедрасының меңгерушісі Татьяна Ахметова бүгінде Қозыбаев университеті бұл бағыт бойынша білім беру қызметін жүзеге асыруда маңызды орын алатынын атап өтті.
Шараға еліміздің жоғарғы оқу орындарының оқытушылары, «Қазақстан халқы ассамблеясы» қызметкерлері, СҚО мектеп оқушыларымен қатар, Омбы облысының «Қараөзек ЖББМ» МББМ оқушылары қатысып, шара барысында өзара пікір алысып, ашық-жарқын әңгіме өткізудің сәті түсті.
«Дәстүрлі құндылықтар дағдарысы жағдайында ұлттық бірегейлікті сақтап қалу, аса өзекті мәселелердің біріне айналуда. Осы тұрғыда мәдени дәстүрлер және оған қатысты барлық ұлттық салт-дәстүрлер мен әдет-ғұрыптар жас ұрпақтың тұрақты дамуының маңызды факторы болып табылады, сол себепті ұлттық мәдени код пен ұлттық дәстүрді сақтау мәселесі үлкен мәнге ие»-деп, «Қараөзек ЖББМ» МББМ директоры Шолпан Сексембаева білім беру деңгейлерінде білім алушылардың зерттеу жұмыстарының бағыттарына тоқталды.
Іс-шарада мектеп оқушылары да өз зерттеулерімен ерекшеленді. Бесікке салу, баланы атқа мінгізу, төрт-түлік малдың маңызы сынды өзекті тақырыптарды қозғады. Зерттеу жұмыстарын қорытындылау барысында қазіргі заманда ұлттық мәдениетті жаңғырту және болашақ ұрпақты тәрбиелеуде әдет-ғұрыптардың рөлін нығайтуға басымдық берілді.
