Генетика мен тарихты қатар зерттеп жүрген тарихшы Жақсылық Сәбитов қазақ халқының ДНҚ-сын зерттеу жұмыстарындағы қызықты мәліметтермен біздің студенттермен бөлісті. Дәріс сағатында ғалым қазақ халқының популяциялық генетикасы, шығу тегі, қазақ руларына қатысты зерттеулер, көне сақтар мен ғұндар арасындағы ұқсастықтар туралы сөз қозғады.
Жақсылық Мұратұлы үш ғылымометриялық деректер базасы (Web of Science, Scopus, РИНЦ ядросы) бойынша қазақстандық тарихшылардың үздік үштігіне кіреді. Web of Science Award «Ғылым көшбасшысы-2020» халықаралық тәуелсіз марапатының лауреаты болып табылады. Тарихшының айтуынша, аталық желі бойынша жасалған ДНҚ зерттеулері қазақтардың рулық шежіресімен көп жағдайда сәйкес келіп отырған.
«Біз генетикалық туыстықтың үш жүйесін қарастырамыз: қазақ руларының шежіресімен, рулық-тайпалық бөлінуімен оңай ұштасатын түзу ерлер желісі; сондай-ақ, митохондриялық ДНҚ, полиморфизм және аутосомдық. Бұл халықтың қашан біртұтас болып қалыптасқанын анықтауға мүмкіндік беретін өте маңызды құралдар», - деді Жақсылық Сәбитов.
Сонымен қатар, ол қала мектептерінің мұғалімдерімен академиялық тарихты өзгерту және оны оқытудың мемлекеттік стандарты бойынша шеберлік сабағын өткізді.
