Зор дауысты орындаушының заманауи әнге жоғары талғамы байқаудың жеңімпазын анықтауға серік болды. Осы жолы Таңшолпан жұлдызы 20-дан астам дарындылардың арасынан ерекшеленіп шыққан Ханшабибі Жақсыбай әнді кең тыныспен, асқақ үнмен шырқап, гран-при иегері атанды. Ханшабибі "Мәдени-тынығу жұмысы" мамандығының 3 курс студенті. Бүгінде бойжеткен ұйымдастырушылық жұмыстармен айналысып жүрсе де, шығармашылық белсенділігін жоғары қояды.
«Репертуарды байқауға екі апта қалғанда таңдауға тура келді. Шынымды айтсам қатты қобалжыдым. Көпшілікке әйгілі «Killing me softly» секілді зор дауысты қажет ететін әнді орындап шықтым. Бұл әнге көптеген вариациялар мен аранжировкалар болды. Әуенді жоғары нотада алып, жинақтауда қиын болса да, әннің мәні мен мағынасын аша білдім. Репертуар таңдауда дауысымның төменгі регистрін де, жоғарғы регистрін де, әр түрлі мелизматикалық әдістерді көрсетуге тырыстым.» - дейді жас әнші.
Осымен «Таң шолпан» аймақтық конкурсы XII рет ұйымдастырылып отыр. Биыл ол университетіміздің 85 жылдығынаарналған. Вокалистер екі номинацияда бақ сынады- «Жеке орындау» және «Ансамбльдер - дуэттер» бағыттары бойынша: академиялық, фольклорлық, эстрадалық вокалдық орындау. Шығармалар әртүрлі репертуарда және қазақ, орыс, ағылшын, украин тілдерінде орындалды.
Таланттылардың бағын ашатын жарысқа Қозыбаев университетінің студенттері, Петропавл мен Степногорск қаласындағы колледж студенттері, Солтүстік Қазақстан және Ақмола облыстарының мектеп оқушылары қатысты. Барлық қатысушылар 2 топқа бөлініп өнер көрсетті. Қазылар алқасы байқауға қатысушылардың бейнежазбалары арқылы дауыс шеберлігі мен музыкалық шығарманың көркемдік дәрежесін түсіндіру деңгейлері бойынша бағалады.
Нәтижесінде, 1-дәрежелі лауреат атақтары 7 адамға берілді. ІІ дәрежелі дипломды 9 орындаушы, ІІІ орынды 6 қатысушы жеңіп алды. «Қазақстан, Отан Елім» арнайы номинациясында Арлан Құрманбаев жеңімпаз атанды. Сондай-ақ, «Қазақстан халқының мәдени мұрасын сақтау» номинациясында озып шыққан Дмитрий Шеффингті құттықтаймыз!
