«Жүректен жүрекке» - осындай атаумен наурыз айының алғашқы мерекесі «Алғыс айту күні» университет қабырғасында тойланды. Мерекелік жиын құттықтаулардан, бір-біріне деген ыстық ықыласпен және ризашылық сөздермен бастау алды. Шараға ҚР Парламенті Сенатының депутаттары, облыстық мәдениет орталықтарының өкілдері, СҚО құрметті азаматтары, профессор-оқытушылар құрамы мен түлектері жиналды.
Желіде сөз сөйлеген ҚР авиациясының генерал-лейтенанты, халықаралық экипаждарының командирі Талғат Мұсабаев: «Жер – ғарыш кемесі, ал адамзат – экипаж. Біздің жер шарын 90 минутта айналып өтіп, ондағы шекаралардың жоқтығын байқауға болады. Сондықтан, ондағы қақтығыстардың алдын алуымыз керек», - деп мерекенің бүкіл қазақ халқы үшін маңыздылығына тоқталды.
Қатысушылар қайырымдылық шаралары, этноконфессиялық келісім, мәдениетаралық диалог туралы әңгімеледі. Бұл күнде тағдыр тәлкегімен Қазақстан жеріне еріксіз қоныс аударған түрлі этнос өкілдерінің қонысына айналған қасиетті қазақ жері мен қонақжай халқына алғыс айтады. Олардың қатарында кәріс, неміс, поляк сынды халықтар қазақ жеріне күні бүгінге дейін ризашылықтарын білдіруде.
«Атаулы мереке еліміздегі тұрақтылықты, бейбітшілікті, ынтымақтастықты сақтаудың бірден бір жолы. Қазақстан еліне сан қилы тағдырлары бар, сан түрлі себептермен тарихымыздың әр кезеңінде түрлі ұлт өкілдері келіп бір шаңырақ астына қоныстанды. Мәселен, біреулері соғыс кезінде депортацияға ұшыраған, сондай-ақ, патша үкіметі тұсында қазақ жеріне қоныс аударған халықтар да болды. Алайда, олардың ұрпақтары жеріміздің топырағында аунап, өсіп-өніп, бүгінде өмірлері мен болашақтарын қазақ елімен байланыстырып отыр. Бұл терең тағзымның белгісі деп ойлаймын» - деп Басқарма Төрағасы - Ректор кеңесшісі Ақмарал Ыбыраева өз сөзінде кішіпейіл болуға шақырды.
