Қыстың ызғары қайтып, көктем лебі сезілгенде халқымыз «Масленица» мерекесін асыға күтеді. Биыл мереке достық пен бауырмалдықта татулықтың мән-мағынасын ұғынған университет шаңырағында оқытушылармен студенттерді біріктірді. Бұл дәстүр қысты шығарып салып, көктемнен жақсылық күтуді білдіреді. Университетіміздің алаңында мерекенің бас символы – тұлып, әуелеген ән, мың бұралған бишілер мерекелік шаттыққа бөледі. «Масленица келеді, құймақ пен бал әкеледі» демекші, тоқаш, құймақтың түр-түрі таратылды.
Мұнымен қоса, өзгелері де өздерінің ұлттық тағамдарын дайындап келді. Көнеден келе жатқан мереке аясында студенттер бірлесіп жарқын бағдарлама дайындады. Славян халқының салт-дәстүрлерін ұсынды. Әртүрлі ойындар мен көріністер мерекенің шырайын аша түсті. Бірнеше ұлт өкілдері қатысатын бұл мереке халықтар достығының белгісіне айналды. Кеш соңында әрбір факультеттің студенттері көпшілікті өз қолдарынан жасаған тағамдардан дәм татуға шақырды. Осылайша бірлігі мен ынтымағы жарасқан студенттер мен оқытушылар достығы, мерекенің ұйымдастырылуына ұйытқы болды. Дәстүр бойынша бұл апта бойы тойланатын мереке.
