Бүгін ҚР Білім және ғылым министрі Асхат Аймағамбетов Қозыбаев университетіне іс-сапарымен келді. Министр алдымен ЖОО салынып жатқан 11 қабатты оқу-зертханалық корпусына атбасын бұрды. Бұл елімізде баламасы жоқ заманауи ғылыми және білім беру кешені. Бұл алдағы уақытта Солтүстік Қазақстан облысына жан-жақтан көптеген талапкерлерді тартуға мүмкіндік бермек.
Құрылыс жұмыстары 2020 жылдың мамыр айында басталды. Ғимараттың жалпы ауданы – 18 мың шаршы метр. Корпусқа инженерия, медицина, жаратылыстану және ауылшаруашылық ғылымдары бойынша 73 зертхана кіретін болады. Заманауи жабдықтар студенттердің практикалық дағдыларын қалыптастыруға оң септігін тигізбек. Онда ғалымдар жергілікті ауыл шаруашылығы кәсіпорындарының тапсырысы бойынша ғылыми жұмыстарды жасайтын болады.
СҚО әкімі Құмар Ақсақалов пен Қозыбаев университетінің Басқарма Төрағасы-ректоры Ерлан Шұлановтан министр ЖОО-да медициналық бағыттың ашу маңыздылығы туралы сұрады. «Бұл бағыт өңір үшін өте қажет. Өйткені көктем мезгілінде боашақ мамандарды бөлу кезінде, шамамен жеті минут ішінде барлығына бірдей жаңа жұмыс орны табылып, емдеу мекемелеріне бөлінді. Тіпті медициналық мекемелер арасында жас кадрлар үшін талас-тартыс болды. Медициналық база бар, біз облыстық көпбейінді ауруханамен келісім бойынша жұмыс істейміз. Онда студенттер оқудан және тәжірибеден өтеді. Біз білім алушыларды «Жалпы медицина» және «Фармация» оқу бағдарламалары бойынша дайындаймыз. Түлектерге деген қажеттілік өте жоғары", - деді ректор.
Сондай-ақ, осы күні Асхат Аймағамбетов Қозыбаев университетінің профессор-оқытушылар құрамымен кездесті. Оқытушылар министрге ЖОО Аризона университетіне сенімді басқаруға беру туралы шешім әр факультетте және кафедрада қабылданғанын айтты. Ұжымның көпшілігі бұл шешімді қолдап отыр және осындай ынтымақтастық жаңа бастамаларға үміт артады. Университетаралық ғылыми коллаборацияны дамыту, оқытушылар үшін жаңа педагогикалық технологияларды оқыту, оқу бағдарламаларын жаңғырту, корпоративтік басқарудың заманауи жүйесіне көшу. Сондай-ақ, студенттер бірден Қазақстандық және халықаралық үлгідегі екі дипломға ие бола алады.
«Қазірдің өзінде көптеген трансформациялық жұмыстар жүргізілуде», - деп сендірді ұстаздар. «Білім беру бағдарламалары жаңартылуда және мүдделі тараптармен тығыз ынтымақтастық жүргізілуде».
Бұл күні облысымыз үшін ҚР Білім және ғылым министрінің қатысуымен өткен республикалық «Тарих» пәні мұғалімдері арасында маңызды съезд өтті.
«Қозыбаев университетінің қабырғасында біз Қазақстанның «Тарих» пәнінің үздік оқытушыларын, ғалымдарын, ғылыми-зерттеу институттарының, жоғары оқу орындарының қызметкерлерін жинадық. Секциялық отырыстарда мектептерде және жоғары оқу орындарында тарихты (Қазақстан және дүние жүзі тарихы) оқыту мәселелері, мектеп бағдарламасын өзгерту және жаңарту қажеттілігі талқыланды. Көптеген ұсыныстар бар. Біз барлық әріптестерді жинап, талқылауды жөн көрдік. Нәтижелері бойынша тиісті шешім қабылданады. Мемлекет басшысы «Тәуелсіздік бәрінен қымбат» атты мақаласында тарих ғылымының алдына жаңа міндеттер қойды. ҚР Білім және ғылым министрлігі жоғары оқу орындарымен және ғылыми-зерттеу институттарымен бірлесе отырып, Қазақстан тарихы бойынша «Қазақстандағы тарих ғылымын дамыту тұжырымдамасы» атты Академиялық көп томдық кітапты жасау бойынша белсенді жұмыс жүргізуде. Президент жолдауда іргелі зерттеулермен айналысатын мекемелер, оның ішінде тарих, мемлекет және құқық институттары тек ұтып алған гранттарына ғана емес, тұрақты түрде қаржыландырылатындай етіп заңнамаға өзгертулер енгізуді тапсырды. Заңға өзгертулер енгізілді және бұл мекемелер енді тұрақты қаржыландыруға ие болады, сонымен қатар, олар гранттық конкурстарға қатысып, қосымша қаржы ала алады. Бұл ғылыми зерттеулердің сапасына әсер ететіні сөзсіз. Бұл тарихшылар үшін үлкен қолдау», - деді Асхат Аймағамбетов .
СҚО нысандарды аралау: Министр оқушылар сарайы мен университетіміздің салынып жатқан оқу-зертханалық ғимараты туралы өз әсерімен бөлісті. «Университетте үлкен өзгерістер бар, трансформация жүріп жатыр. Оқу бағдарламалары жаңартылуда. Жаңа ғимарат салынып жатыр. Бұл нысан биыл қыркүйек айында пайдалануға беріледі деп жоспарланған. Заманауи жабдықтармен жабдықталмақ. Университет қазір қос дипломдық бағдарламаларды ашып, шетелдік серіктестерімен белсенді жұмыс істеуде. Бұл, әрине, өте маңызды шешімдер. Біз бұл бастамалардың барлығын қолдайтын боламыз», - деп сендірді министр.
Съезде елімізге белгілі ғалымдар, тарихшылар баяндама жасады. Олар мемлекеттік білім стандартының, оқулықтар мен оқу бағдарламаларының мазмұны, педагог кадрларды қайта даярлау, біліктілігін арттыру және т.б. мәселелерін көтерді. Шара барысында облыс мұғалімдерінің, мектеп оқушыларының, студенттердің тарих, археология және өлкетану пәндері бойынша ғылыми жетістіктерінің көрмесі ұсынылды.
