2022 жылғы 3 наурызда университетіміздің қабырғасында тарих мұғалімдерінің республикалық съезі өтті. Тақырыбы – «Мектептегі тарихи білім: жаңа тұжырымдама, ашық сана, заманауи көзқарас». Іс-шараға ҚР Білім және ғылым министрі А.Қ. Аймағамбетов, Ы. Алтынсарин атындағы Ұлттық білім академиясының президенті Г. Б. Бейсембаев, ҚР БҒМ ҒК Ш.Ш. Уәлиханова атындағы Тарих және этнология институтының директоры З.Е. Қабылдинов, Л.Н. Гумилев атындағы ЕҰУ Басқарма төрағасы-ректоры Е.Б. Сыдықов, «Назарбаев Зияткерлік мектептері» Педагогикалық өлшемдер орталығының және «Ұлттық тестілеу орталығы» әдіскерлері, жоғары оқу орындарының оқытушылары, орта білім беру әдіскерлері, тарих пәні мұғалімдері қатысты. Съезде жаңартылған білім беру мазмұны аясында тарихты оқытудың жаңа тұжырымдамасын құру қажеттілігі, пәнді оқыту әдістемесі және тарихшы мамандығының жаңа форматын қалыптастыруда педагогикалық жоғары оқу орындарының мектептермен ынтымақтастық бағыттары, оқу бағдарламалары, бағалау жүйесі, оқулықтар, кадрлар даярлау мәселелері талқыланды.