Наурыз айынының тағы бір мерекесі - «Көрісу» күні. Бұл күні бұрынғы өкпе-реніш кешіріліп, араздық ұмытылады. Көрісу - тек адамдардың бір-біріне амандасып, жақсылық тілейтін, бір-бірімен қауышатын мереке ғана емес, сондай-ақ, жасы үлкендерге ізет көрсетіп, ілтипат білдіретін күн. Өйткені, «Көрісу» салты бірінші күннен бастап, айдың соңына дейін дәстүрлерді дәріптеумен жалғаса береді. Тіршілік атаулы жаңаратын бұл кезеңді халқымыз «Амал мерекесі» деп те атайды.
Ұлттық мерекелер мен дәстүрге, әдет-ғұрыпқа ерекше мән беретін Қозыбаев университеті бұл мерекені елеусіз қалдырмады. Студенттер бір-бірімен құшақ жая амандасып, ықыласқа бөленіп, дайындалған бауырсақтар мен 70 келі палаудан дәм тәтті. Сонымен қатар студенттер бірі-бірімен қауышу мерекесіне арналған кішігірім қойылым қойды.
Мерекелік күн бозбалалар мен бойжеткендердің «Бөрік теппек» ұлттық ойынының жарысымен жалғасты. Бұл студенттер арасындағы ұлттық ойындарды насихаттау және мәдени интеграцияны сақтай отырып, халқымыздың мұрасын байыту.
Ойын студенттер арасында командалық және жеке біріншілікте өтті. Әр қатысушы кезекпен сызықтың артында тұрып қолға толтырылған допты мүмкіндігінше лақтырды. Командалық біріншілікте ТЭҚФ командасы ең көп ұпай жинап 1 орынды, ал, 2 орынды ПФ иеленді және 3 орынға ИСТФ жайғасты. Ал, жеке біріншілікте ойын қорытындысы бойынша ең жылдам әрі шапшаң өнер көрсеткен ТЭҚФ студенті Еламан Қоспаев үздік деп танылды.
Жарыс университетіміздің «Сұңқар» спорт клубымен бірлесіп «Amanat» партиясының «Болашақ» аумақтық филиалының қолдауымен өтті. Наурыз мерекесіне орай өткізілген бұл шара ұлттық мерекенің мәнін түсіндіре отырып, татулық пен бейбітшілікті сақтауға бағытталды.
