Жыл сайын археологиялық ғылыми орталығымыз Солтүстік Қазақстан өңіріндегі тарихи-этнологиялық және археологиялық зерттеу жұмыстарын жүргізіп, жоғары кәсіби тарихшыларды, археологтарды, өлкетанушыларды, дайындайды.
Қозыбаев университеті мен Ә. Марғұлан атындағы Археология ғылыми-зерттеу институты бірлесіп археология ғылымының қазіргі жағдайы және мамандарды даярлау, ескерткіштерді сақтау бағытындағы көлемді жұмыстарды талқылады. Кездесу барысында екі жақ арасында өзара ынтықмақтастық туралы меморандумға қол қойылды. Келісімнің нәтижесінде біздің студенттер, оқытушылар, ғалымдар ескерткіштерге кең археологиялық жұмыстар жүргізуге мүмкіндік алады.
Университеттің тарих ғылымы мен білімінің даму бағыттарына тоқталған ТЭҚФ деканы Зәуре Картова: «1967 жылдан бастап Солтүстік Қазақстан археологиялық экспедициясы іске асырылуда. Бұл экспедиция барысында 2 мыңға жуық археологиялық ескерткішткер зерттеліп, қажетті құжаттары дайындалды. Енді ғылыми институт аясында археолог мамандар мен магистрларды дайындауға мүмкіндік туып отыр. Оқу ордамыз үшін бұл археологияның дамуына ықпалдасатын қадам. Анықталған ескерткіштер мен қазба жұмыстары бойынша ғылыми зерттеу жүргізетін боламыз»,- деп атап өтті.
«Сапалы білім тек ғылыми зерттеулермен шектеліп қалмайды. Сондықтан ғылыми-зерттеу институтымен серіктестік – жақсы тәжірибе болмақ. Олар мақсатты және гранттық қаржыландыру аясында ең өзекті ғылыми зерттеулер жүргізетін болады. Бұл зерттеулер студенттердің оқу бағдарламаларына кедергісіз енуі үшін осындай интеграция қажет», - деп бөлісті Басқарма Төрағасы – Ректор Ерлан Шұланов. Қол қойылған меморандум аясында екі жақтың ынтымақтастығы СҚО археологиялық ғылыми зерттеу жұмыстарын ұйымдастыруға бағытталады.
