СҚО әкімі Құмар Ақсақаловтың облыс өкілдерімен баспасөз туры өтті. Шара барысында олар қаламызда салынып жатқан бірнеше нысанды аралады. Солардың бірі Қозыбаев университетінің жаңа оқу-зертханалық ғимараты. Басқарма Төрағасы– Ректор Ерлан Шұлановтың айтуынша, қыркүйек айында мұнда біздің студенттер, оның ішінде Аризона университетімен бірлесіп жүзеге асырылатын қос дипломдық білім беру бағдарламаларына оқуға түсе алатын білім алушылар оқи бастайды деп күтілуде.
«Облыстың негізгі басымдықтарын ескере отырып, агротехникалық және инженерлік бағыттағы білім беру бағдарламаларына басты назар аударылады. Қазір біздің оқытушылар американдық әріптестерімен бірлесе отырып, агрономия (өсімдік шаруашылығы) және азық-түлік өнімдерін өңдеуге баса назар аудара отырып, қолданбалы биотехнология бойынша екі бағдарлама әзірлеуде», - деді Ерлан Шұланов.
Алғашқы оқыту мемлекеттік гранттар бойынша жүзеге асырылады. Олардың 1000-ға жуығын бөлуді жоспарлап отыр.Университетте сабақ өткізуге АҚШ пен жетекші қазақстандық университеттерден профессорлар тартылады. 50-ге жуық оқытушымыз Аризона университетінде тағылымдамадан өтіп, біліктілігін арттырса, 200-і тілдерді қайта даярлау курсынан өтеді, 10 бірлескен ғылыми жоба қолға алынбақ.
«Бұл өңірдің әлеуметтік-экономикалық дамуы үшін өте маңызды жоба. Сондықтан, ОЗК салынып жатыр, жабдықтар сатып алынуда және Аризона университеті де бірлесе жұмыс атқаруда. Сондықтан мұнда мектеп бітірген үздік балалар жақсы нәтижелер көрсететін болады», - деді облыс әкімі.
