Ғұмырының ең қанық әрі маңызды кезеңін Қозыбаев университетіне арнаған Атығаева Клара Міңайдарқызын 70 жылдық мерейтойымен құттықтауға әріптестері мен университет басшылығы жиналды. Мерейлі күнде өз қолтаңбасын қалдыра білген ұстаздың, шәкірттеріне сапалы білім беру, тәрбиелеу жұмысындағы өлшеусіз еңбегі үшін Басқарма Төрағасы – Ректор Ерлан Шұланов Қозыбаев төсбелгісімен марапаттап, гүл шоқтарын табыстады.
Бүгінде «Практикалық қазақ тілі» кафедрасының доценті, педагогика ғылымдарының кандидаты Клара Міңайдарқызының ұстаздық еңбек жолы үлкен. Қазақ филологиясы кафедрасының тұңғыш меңгерушісі болды. 1988 -1989 жылдары ол орыс тілі кафедрасының меңгерушісі қызметін атқарды. Кафедраға жетекшілік ете жүріп, ұйымдастырушылық жұмыстарды қатар ұстап, ғылыми әлеуетін шыңдай түсті. Атап айтқанда,1994 жылы Клара Атығаеваға доцент ғылыми атағы берілді.
Жоғары білімді маманның университет дамуына қосқан зор үлесі мен еңбек тәжірибесі жоғары бағаланды. ҚР білім беру саласына еңбегі сіңгені үшін ол «ҚР Білім беру саласының үздігі» төс белгісімен марапатталды. Оның көпжылдық еңбегі ҚР БҒМ Алғыс хатымен белгіленді. Университетіміздің дамуына зор үлес қосқаны үшін «Үлкен алтын медальмен» марапатталды.
Білікті маман орыс тілді аудиторияда қазақ тілін оқыту әдістемесі саласында зерттеулермен айналысады. Өмірде өз орнын, өзінің сүйікті ісін тапқан Клара Міңайдарқызы-50-ден астам ғылыми еңбектерінің авторы. Жетпіс жасыңызды жарқын көңілмен қарсы алып, мерейтой сәтінде өзіңізге мықты денсаулық, отбасыңызға береке, шығармашылық табыстар тілейміз!
