Ағымдағы жылғы сәуірдің 21-22 аралығында Арқалық қаласындағы Ыбырай Алтынсарин атындағы педагогикалық институт базасында Қазақстан бойынша базалық жоғары оқу орындары студенттері арасында 6B01201 «Мектепке дейінгі оқыту және тәрбиелеу» білім беру бағдарламасы бойынша XIV Республикалық пәндік олимпиадасы өтті. Ережелерге сай Олимпиада «Тәрбиеші –ұлағатты тәрбиенің тірегі» таныстыру, «Студент қиялындағы болашақ» шығармашылық жобалар, «Жалпыұлттық құндылықтарды көркем шығармаларда интеграциялау» сахналық қойылым, «Болашақ маман шеберлігінен...» балабақшада ұйымдастырылған оқу қызметін ұйымдастыру, «Білімді мыңды жығар...» теориялық байқау кезеңдерінен құрылған.
Үлкен додаға «Бастауыш және мектепке дейінгі білім берудің теориясы мен әдістемесі» кафедрасының оқытушысы М. Кәсенованың жетекшілігімен университетіміздің 6B01201 «Мектепке дейінгі оқыту және тәрбиелеу» білім беру бағдарламасының 2-3 курс студенттерінен құралған «Тақиялы тәрбиешілер» тобы қатысып, бағын сынады. Абилдиева Гульнур «Мектепалды тобы балалардының әлеуметтік-коммуникативтік дамуындағы медиа орталығының рөлі» атты шығармашылық жобаны қорғаса, Серікбай Ақерке балабақшада ересек топ балаларына «Таным» білім беру саласы бойынша «Жаратылыстану» пәнінен «Ауа» тақырыбында ұйымдастырылған оқу қызметін өткізді. Ал Амангелдиева Гүлжүзім мен Өмірсейітқызы Күмісай теориялық байқауға қатысты.
Дода нәтижесінде «Тақиялы тәрбиеші» тобы жүлделі ІІІ деңгейлі дипломмен марапатталды. І-ші орынды Талдықорған қаласының Ілияс Жансүгіров атындағы Жетісу университеті алып, келесі жылы 6B01201 «Мектепке дейінгі оқыту және тәрбиелеу» білім беру бағдарламасы бойынша XV Республикалық пәндік олимпиадасын ұйымдастыру мүмкіндігіне ие болды.
Олимпиадаға дайындығын бір жарым ай бұрын бастаған топ «Бастауыш және мектепке дейінгі білім берудің теориясы мен әдістемесі» кафедрасы, «Балауса» балабақшасы, С. Мұқанов атындағы Солтүстік Қазақстан сазды-драма театры, «AMANAT» партиясының «Болашақ» аумақтық филиалы ұжымдарына алғыс айтады.
