Биыл ректор грантын алу үшін байқауға 13 жоба ұсынылды. Ең алдымен, университетіміздің 35 жасқа дейінгі магистранттары, докторанттары және оқытушылары, ұйымдастыру комитетіне өтінімдер мен электронды презентациялар жіберіп, екінші кезеңде техникалық, жаратылыстану және гуманитарлық бағыттар бойынша жұмыстарын оффлайн режимінде ұсынды.
Жаңашылдылығы мен өзектілігі және әлеуметтік-экономикалық тиімділігі бойынша Ғылым басқармасы мен Жас ғалымдар кеңесінен құралған қазылар алқасы жас ғалымдардың ғылыми жобаларын бағалап, байқаудың 6 жеңімпазын анықтады.
1. Данияр Әбутәліп – ТЭҚФ докторанты, жоба тақырыбы: «Өңірдің тұрақты әлеуметтік-экономикалық дамуын бағалау».
2. Әлібек Әділбеков – ИСТФ аға оқытушысы, «SensorFusion платформаларына бейімделу функциясы бар электрондық-оптикалық және радиолокациялық арна арқылы ҰҰА танып-білуге және жіктеуге арналған бағдарламалық қамтамасыз етуді әзірлеу» тақырыбын қорғап шықты.
3. Анна Мещанова – МЖҒФ докторанты, тақырыбы: «ҚР агроөнеркәсіптік кешенін дамыту үшін өсуге ықпал ететін белсенділігі бар бальзамды терек негізінде биологиялық белсенді препараттарды дайындау технологиясы».
4. Меруерт Омарова – ПФ оқытушысы, жоба тақырыбы: «Қозыбаев университетінің білім беру жағдайында ізгілік педагогиканың қағидаттарын қолдану мақсатында оқу пәндерін интеграциялау».
5. Евгений Романенко – МЖҒФ магистранты, «Мектеп оқушыларын биологиядан түсу емтихандарына дайындау үшін электрондық оқулықтар әзірлеу» жобасын зерттеді.
6. Алена Яневич – МЖҒФ оқытушысы, жоба тақырыбы : «Табиғи майларды қолдану арқылы кремді негіздердің композицияларын жасау және зерттеу».
Бір жыл ішінде олар ҚР Білім және ғылым сапасын қамтамасыз ету комитеті ұсынған басылымдарда өз жобасының тақырыбы бойынша 2 мақала немесе нөлдік емес импакт-факторы бар шетелдік ғылыми журналда 1 мақала жазуы қажет. Байқаудың жалпы жүлде қоры 1 миллион 800 мың теңгені құрады. Қаржының жартысы «Нұрсұлтан Назарбаев Қорынан» «Үздік ҚР ЖҒК» байқауында жеңіске жеткені үшін университетіміздің Жас ғалымдар кеңесінің қызметін дамыту үшін берілді.
