Биыл СҚУ еңбек сіңірген профессоры, тарих ғылымдарының кандидаты, археолог Анатолий Плешаковтың 70 жылдығы Солтүстік Қазақстан археологиялық экспедициясының 55 жылдығына тура келді.
ЖОО-да өткен «Археология – ғасырлар мен ұрпақтар арқылы өтетін тарих көпірі: кəсіп пен тағдыр» атты дөңгелек үстел университетіміздің еңбек сіңірген профессорына лайық құрмет көрсетуден басталды. Құттықтау тілегін білдіріп, Басқарма Төрағасы – Ректоры Ерлан Шұланов, Ғылым және жоғары білім министрі Саясат Нұрбектің атынан еңбек жолындағы жоғары нәтижесі үшін Анатолий Плешаковқа «Еңбек ардагері» марапатын тарту етті.
«Қазір университеттің ғылыми әлеуетін көтеру жұмыстары жүріп жатыр. Өздеріңіз білетіндей, бір айдан соң жаңа оқу-зертханалық корпусты ашуды көздеп отырмыз. Ғимараттың құрамында гипс зерттеу бойынша лаборатория бар, ол біздің археологиялық нысандарды зерттеу үшін үлкен қолдау болады деп күтілуде. Сондай-ақ, академиялық шеберлік орталығы аясында сандық археологиялық , антропологиялық және этнографиялық зерттеулер зертханаларын сатып алуды жоспарлап отырмыз.Сонымен қатар, археология бағыты бойынша докторантураның ашылуы осы бағытта біздің әлеуетімізді қалпына келтіруге мүмкіндік береді»,-деді Ерлан Шұланов.
Бүгінде профессор бастаған экспедиция Солтүстік өңірдің материалдық мәдениеті мен мәдени мұрасын зерттеуге үлкен үлес қосты . Археологтың еңбек жолы, ғылыми өмірі Солтүстік Қазақстан археологиялық экспедициясының тарихымен тығыз байланысты. Анатолий Плешаков 40 жылдан астам экспедицияны басқарып келеді, ғылыми-зерттеу жұмыстарымен де жемісті айналысады, оның 200-ге жуық ғылыми еңбектері мен монографиялары жарияланды.
Жарты ғасырдан астам СҚАЭ ғылыми-зерттеу қызметінде солтүстік өңірдің бірегей ескерткіштері ашылып зерттеліп келеді. Солардың бірі Ақерей ескерткіші. Жиын Қызылжар ауданы, Долматово ауылындағы Ақерей археологиялық алаңында далалық ғылыми-тәжірибелік семинармен жалғасын тапты. Мұнда осы жылдың жазғы маусымының қазба жұмыстарының көрсетілімі өтті. Солтүстік Қазақстан археологиялық экспедициясының археологиялық олжаларының қола және темір дәуірінің керамика мен зергерлік бұйымдарының көрмесі үйымдастырылды. Келген қонақтар назарына «Киім тігу және пішу», «Астық ұсақтау» сынды шеберлік сабақтар ұсынылды.
Ә.Марғұлан атындағы Археология институты директорының орынбасары Талғат Мамыров өз сөзінде: «Солтүстік Қазақстан археологиялық экспедициясын жандандыру және Солтүстік Қазақстан өңірін зерттеу жөніндегі кешенді бағдарламаларды бастау мақсатында ,биыл Археология институты және СҚУ бірлесіп, Петропавл қаласында Археология институтының филиалын ашу көзделген. Филиалдың жұмысы жас студенттерді даярлап, өңірді зерттеуге бағытталатын болады. Ашылуы қыркүйек айына жоспарланған»-атап өтті.
