2022 жылдың 29 -шы қыркүйек күні М. Қозыбаев атындағы Солтүстік Қазақстан мемлекеттік университетінің «Тіл және әдебиет институтында» «Практикалық қазақ тілі» мен «Шет тілдері» кафедраларының ұйымдастыруымен «Полиглот» атты аймақтық зияткерлік сайысы өтті. Байқаудың мақсаты – жастар арасында көптілділікті рухани құндылық ретінде насихаттау, оларды толеранттылыққа, мәдениаралық коммуникациялық құзіреттілікке тәрбиелеп, тіл үйренуге ынталандыра түсу. Қатысушылар мен көрермендердің назарына университет кітапханасы «Тіл – баға жетпес» атты танымдық көрмесін дайындады.
Аймақтық зияткерлік сайысы 5 кезеңнен тұрды:
1-кезең: «Тұсаукесер»
2-кезең: «Білімпаз»
3-кезең: «Үш тілдің патшалығы»
4-кезең: «Болашақ біздің қолымызда»
5-кезең: «Өнерліміз бәріміз»
«Полиглот» атты аймақтық зияткерлік сайысы достық және шығармашылық атмосферада өтті. Сайыс барысында студенттер ынта-жігер мен жоғары белсенділік танытты. Жарыс қорытындысы бойынша құрметті I орынды Мағжан Жұмабаев атындағы жоғары педагогикалық колледжінің командасы иеленді, II орын – Манаш Қозыбаев атындағы Солтүстік Қазақстан университетінің командасы мен Бәйкен Әшімов атындағы машина жасау және көлік колледжінің командалары, III орын – Ұлттық ұланы Академиясы Медициналық колледжі, Құрылыс-экономикалық колледжі командалары . Жеңімпаздарға грамоталар мен бағалы сыйлықтар табыс етілді. Командаларды байқауға дайындаған оқытушылар алғыс хаттармен марапатталды.
