Даналығы мен еңбегін университетке арнаған профессор, мерейтой иесі Зинаида Петровна білім ошағымыздың басшылығы атынан Басқарма Төрағасы- Ректор Ерлан Шұлановтың құттықтау лебізін қабыл алды.
Университеттегі қызметтік жолында оқытушы өзін құзыретті маман ретінде көрсете білді. Ол «Орыс тілі мен әдебиеті» кафедрасында сабақ беріп, ұзақ жылдар бойы басқарды. Берген тәлімі мен сабақтары әрдайым жоғары кәсіби деңгейімен ерекшеленіп келеді. Зинаида Петрованың бастамасымен кандидаттық диссертацияларды қорғау кеңесі ашылды. 11 кандидаттық және 40-тан астам диссертация профессордың жетекшілігімен қорғалды. Осы салада шәкірттер тәрбиелеп шығарған оқытушының зор еңбегі байқалады.
Тәжірибелі ұстаздың 200-ге тарта ғылыми еңбектері жарыққа шыққан. Бүгінде көпке қадірлі оқытушының ғылыми мектебі Қазақстанда ғана емес, шетелде де танымал, оның ғылыми қызметі туралы Хельсинкиде басылып шыққан «Кто есть кто в современной русистике»» атты халықаралық энциклопедияға енгізілген. Сондай-ақ, шығармашылық еңбек жолында Зинаида Петровнаның ғылыми қызығушылықтары өте кең: синтаксис, этнопоэтика, лингвомәдениеттану, когнитивтік лингвистика, әлемнің тілдік суреті.
Оқытушының кәсіби шеберлігі, қажырлы еңбегі және белсенді қоғамдық жұмысы жоғары наградалармен: «Ерен еңбегі үшін», «Еңбек ардагері», «ҚР білім беру ісінің үздігі», «Білім беру ісінің құрметті қызметкері» төсбелгілері, «СҚО Құрметті азаматы» атағы, ҚР ҒЖБ министрлігінің, облыс әкімінің құрмет грамоталарымен марапатталды.
Мерекеңізбен құттықтай отырып, құрметті Зинаида Петровна сізге мықты денсаулық, ұзақ ғұмыр, еңбегіңіздің жемісін көріңіз деп тілейміз!
