Білім ордамызға Аризона университетінің делегациясы келді. Бұл жолы серіктестер педагогикалық бағыттағы бірлескен білім беру бағдарламаларын талқылау үшін жиналды. инклюзивті және STEAM оқытуға ерекше көңіл бөлінді. Аризона өкілдері Қозыбаев университетінің және СҚО білім басқармасының басшылығымен, мектептер мен инклюзивті орталықтардың директорларымен және студенттермен кездесті.
«Сапарымыздың негізгі мақсаты – Қозыбаев университетімен одан әрі ынтымақтастық орнату үшін Қазақстандағы жоғары білім беру жүйесімен жақынырақ танысу, мұғалімдердің біліктілігін арттыру және т.б. Қаланың бірнеше мектептерінде болдық, оқу үдерісінің қалай жүргізілетінін білу қызықты болды. Сонымен қатар, қос дипломдық бағдарламалар бойынша оқып жатқан студенттермен кездесу біз үшін маңызды сәт. Бірлескен бағдарламалар бойынша алғашқы оқу жылы болғандықтан, білім алушылармен кері байланыс орнату қажет. Мұның бәрі бізге қолданыстағы білім беру бағдарламаларын жақсартуға көмектеседі», - деді Роберт Берри, Аризона университетінің білім беру колледжінің деканы.
Оқушылар сарайында әріптестер жоғары сынып оқушыларымен кездесті. Барлығы 200-ден астам оқушы қатысты. Олар ЖОО-ның және Аризона университетінің білім беру бағдарламаларымен танысып, факультеттер туралы қажетті ақпарат алды: оқу бағыттары, қос диплом алу мүмкіндіктері.
№ 2 орта мектептің 11-сынып оқушысы Давид Стрижнев өз әсерімен бөлісті: «Мен көптеген университеттерді қарастырдым. Өзім ағылшын тілін жақсы білгендіктен қос дипломдық бағдарлама, сондай-ақ, екі диплом алу мүмкіндігі бірден қызықтырды: Қазақстан мен АҚШ». Енді бағымды сынап, осында оқуға түскім келеді.
Айта кетсек, қазір 44 адам IT және биотехнология саласындағы қос дипломдық ББ және 110-ға жуық студент халықаралық ББ бойынша білім алуда. Келесі жылы бірлескен бағдарламалар тізімін кеңейту жоспарлануда.
