ЖОО-да талапты білім алушыларды ынталандыруға бағытталған жұмыстар жалғасын тауып жатыр. Биыл алғаш рет Қозыбаев университетінің профессоры, Қазақстанның еңбек сіңірген қайраткері, бүкіл саналы ғұмырын ұлттық журналистика мен ғылымды дамытуға арнаған тұлға, ұлағатты ұстаз Зарқын Сыздықұлы өзінің атаулы шәкіртақысын тағайындады.
Осындай мүмкіндікке «Журналистика» кафедрасының 3 курс студенті Ұлан Ыдырыс ие болды: «Мен үшін бұл үлкен жауапкершілік. Енді жоғары белестерден көрінуге тырысамын. Мықты маман, журналист атану үшін үлкен мотивация алдым. Біріншіден осындай деңгейге жеткенім, оқытушылардың жемісі деп білемін».
Аталмыш шәкіртақы 45500 теңге көлемінде, жарты жылдық оқуға білім алушының оқудағы үздік көрсеткіші, қоғамдық жұмыстарға атсалысқаны үшін берілді. Университет қабырғасында ұзақ жылдар шәкірт тәрбиелеп, өз мамандығының нағыз майталманы болған ұстаздан марапат алу үлкен мәртебе. Зарқын Сыздықұлының айтуынша тағайындалған шәкіртақы қабілетімен көзге түскен білім алушыларды көтермелеу мақсатында берілді. Студенттердің білімге деген құштарлығын арттырады деген сенімде. Қуаныш иесін құттықтаймыз! Осындай өнегелі тұлғалардың атаулы стипендиясын иелену - әр студент үшін мақтаныш!
