ЖОО-ға ҚР ҰҒА академигі, техника ғылымдарының докторы, профессор Оңдасын Әшімов келді. Алдымен меймандар СҚО құрметті азаматы Бәйкен Әшімовтың ескерткішіне гүл шоқтарын қойып, қоғам қайраткерін еске алды. Өзінің туған оқу ордасында 2002-2017 жылдар аралығында ректор қызметін атқарған профессор әріптестерімен бас қосып, СҚО азаматтырымен, ПОҚ және қызметкерлермен кездесті.
Ішкі саясат басқармасының басшысы Кемел Оспанов ғалымның қызметтік жолына тоқталды: «Бойыңыздағы табандылық пен жауапкершіліктің арқасында жоғарғы оқу орнында жұмыс істеген уақытта үлкен нәтижелерге қол жеткіздіңіз. Сіздің басшылығыңызбен университет отандық білім беру жүйесінде өз ұстанымын нығайтты. Материалдық техникасын жақсартты. Ғылыми ізденіс барысында электротехникалық жабдықтарды құру, энергияны сақтау мәселесіне арналған ғылыми еңбектеріңіз жарыққа шықты».
Басқарма Төрағасы – Ректор Ерлан Шұланов осыдан бірнеше жыл бұрын университетке басшылық еткен Оңдасын Әшімовтың сіңірген еңбегін атап өтті: «Біз сіздердің бастамаларыңызбен жүзеге асырылған Қазақстанның басқа университеттерінде теңдесі жоқ обсерватория мен бассейн сыңды үлкен жобалардың куәгеріміз. Студенттердің сапалы медициналық көмекке қол жеткізуі үшін көптеген жұмыстар атқарылды. Денсаулық сақтау орталығы салынды, бүгінде студенттер мен оқытушыларға сапалы медициналық қызмет көрсетіледі. Сіздің университеттердің Ұлы Хартиясына қол қойып, Болон процесіне қосылуыңыз университет дамуының маңызды кезеңдерінің бірі еді».
Бұл күні Оңдасын Әшімовке Қозыбаев университетінің құрметті профессоры атағы берілді. Академиктің айтуынша, алған марапаттардың ішінде бұл атақ ол үшін ерекше қымбат: «Жылы қарсалған әріптестеріме алғыс айтамын. Себебі біздер өте қиын уақытта қызмет еттік. Бұл ҚР жоғары білім беру жүйесі түбегейлі өзгерістерге ұшырап, еуропалық білім беру жүйесіне: бакалавриат, магистратура, PhD докторантурасына көшкен 2000 жылдардың басы еді. Университет ұжымы білім беру бағдарламаларын жетілдіру үшін күні-түні жұмыс істеді».
Оңдасын Бәйкенұлы заманауи жаңа зертхана ғимараты мен соңғы үлгідегі жабдықтарды жоғары атап өтіп, университеттің жаңа инфрақұрылымымен: жатақханалар және ЖОО құрылысымен танысты.
