Теоретиктер мен кәсіби журналистер қауымынан құрылған «ҚазМедиаЖелі» қоғамдық бірлестігі жас әріптестерімен кездесіп, шеберлік сыныптарын, арнайы семинарлар мен тренигтер өткізуде. Бұл бірлестіктің құрамында біздің «Журналистика» кафедрасының доценті Айсұлу Шайкенова да бар. Айсұлу Жақсылыққызы өңірімізде, Ақмола облысына сапарлап медисауаттылық тақырыбында дәрістер оқуда. Ғалым осы жолы өзі басқарып отырған кафедра студенттері үшін тренинг өткізді.
Бұл жолғы тренингтің тақырыбы медиаэтикаға арналды. Шеберлік сағатына кафедраның қазақ және орыс топтарындағы студенттер шақырылып, шара екі тілде өтті. Айсұлу Жақсылыққызы алматылық әріптесі, «KazMediaNetwork» ұйымының негізін қалаушылардың бірі Бақтыгүл Бұрбаеваны арнайы шақыртқан. Сондай-ақ жергілікті “МТРК” арнасының редакторы Данаш Хамзинаның да болашақ журналистерге айтар кеңесі мен сілтер бағыты көп болды. Дәріскерлер теориялық және практикалық негізде медиаэтика тақырыбын жан-жақты талқылады.
Тренингте тақырыпты ойға сіңіру жеңіл болу үшін түрлі тәсілдер қолданылды. Арнайы дайындалған слайд, видеороликтерде кәсіби этиканы үйрену, дағдылану мысалдары айтылды. Тақырып бойынша құрастырылған кейстерді талдау арқылы көптеген мәліметтер білгілі болды. Бақтыгүл Бұрбаеваның слайдтары да тақырыпты аша түсті.
Тақырыпқа тұздық ретінде ойын-жаттығулар ұйымдастырылды. Жылдамдыққа баулитын куиз тестің де өзіндік пайдасы бар. Қатысушылар 4 топқа бөлініп, сын сағатына түсті. Жастар, Аманат, Жұлдыз, Қайрош деген атауды арқалағандардың ішінде білімі мен білігі басым түскен «жұлдыздықтар» болды. Қатысушылар шараны ұйымдастырушылардың «Презент сыйлығынан» да құралақан кетпеді. Ең бастысы - медиаэтика туралы білімдерін тереңдетіп шықты.
