Өткен жылғы түлектердің шамамен 90%-ы жұмыспен қамтылды. Осындай жоғары көрсеткіш, жұмыс берушілермен тығыз қарым-қатынастың нәтижесі. «Қаржы орталығы» АҚ-ның мамандары университетіміздің білім алушыларымен, түлектерімен кездесіп, гранттарды жұмыспен өтеу бойынша мониторинг жүргізді.
Кездесу барысында мемлекеттік білім беру тапсырысы негізінде оқитын түлектерді жұмыспен қамту мәселелері талқыланды. Грантты өтеу санаттары: мемлекеттік білім беру тапсырысы, оның ішінде, бакалавриат, магистратура, резидентура, PhD докторантура ,«Серпін», ауылдық квота шеңберінде оқитын білім алушылар.
Жұмысқа орналасу және грантты өтеу туралы толық ақпаратпен «Қаржы орталығы» АҚ мониторинг департаментінің қызметкері Айгүл Нұрбекова бөлісті: «1 маусымға дейін түлектер ЖОО комиссиясына анықтама немесе өтініш беруі тиіс. 1 қыркүйекке дейін ағымдағы жылы оқуын аяқтаған барлық жас мамандар жұмысқа орналасуға тиіс. Егер дәлелді себептермен осы мерзімге дейін жұмыс табу мүмкін болмаса, бір-екі ай өткеннен кейін біз міндетті жұмыс туралы хабарлама жібереміз. Егер бұл жүйе кешіктірілсе, сот процестеріне дейін баруы мүмкін».
«Серпін» бағдарламасының түлектерінде жұмыс істеу мерзімі 2 жылды құрайды, қалған санаттарға–3 жыл. 2022 жылдан бастап мамандар СҚО-да ғана емес, республиканың 11 облысында да жұмысқа орналаса алады. Егер жұмыс табылмаса, халықты жұмыспен қамту орталығына хабарласу қажет.
