Оқу ордамыз осынау уақыт аралығында өзінің қалыптасу сатысынан өтті. ЖОО-ға университет дамуына түрлі кезеңде өз үлестерін қосқан, 40 жылға жуық еңбек жолдарын қалдырған, облыстың құрметті азаматтары, Ардагерлер кеңесінің ең белсенді мүшелері ат басын бұрды. Университет басшылығы, облыс ардақтыларымен, санаулы уақытта бой көтерген жаңа оқу-зертханалық корпусты аралады.
Алқалы жиында Басқарма Төрағасы – Ректор Ерлан Шұланов қара шаңырақтың жетістіктерімен бөлісіп, жаңа корпус құрылысының жаңашылдықтарымен таныстырды: «Жақын арада зертханалардың 20% жабдықтармен қамтамасыз етілуі тиіс. Қыркүйек айынан бастап студенттердің бірқатар сабақтары осында өткізіліп жатыр. Үш қабат белсенді түрде пайдаланылуда. Ал енді биылғы оқу жылынан бастап зертханалар өз жұмысын бастайды. Қазір біз ғылымға екі есе көп қаржы бөлдік. Алдағы мақсат – ғылымды нақты секторға әкелу, өндірісімізді іске қосу. Айта кетсем, бірінші академиялық шеберлік орталығы бізде құрылады».
Басқосуда университеттің басшылық құрамы, ғылым және білім, медицина саласындағы бірқатар сұрақтар бойынша Ардагерлер кеңесімен ақылдасып, ой-пікірлерін ортаға салды.
