Қозыбаев университеті жоғары оқу орнының қалыптасуы мен дамуына үлестерін қосқан ректор басшыларын әрдайым қарсы алады. Осы жолы ат басын бұрып, 4 жыл оқу ордамыздың ректорлық қызметінде болған, қазірде Халықаралық ақпараттандыру академиясының академигі, экономика ғылымдарының докторы, Astana IT University ректорының м.а. Серік Мәуленұлы ПОҚ пен жүздесті.
Басқарма Төрағасы – Ректор Ерлан Шұланов бірінші басшының университетке сіңірген еңбегін атап өтті: «Біз сізді беделді маман ретінде білеміз. Мұнда академиялық саясатқа қатысты үлкен қадамдар жасалды. Жоғары медицина мектебі ашылды, оқытушылар тартылды, материалдық база қалыптасты, Үндістаннан шетелдік студенттер бізге оқуға түсті, медициналық колледжбен байланыс орнатылды. Биыл бұл бастама өз жемісін беретін болады. Медицина факультетінің алғашқы түлектерін еңбек нарығына жіберуді жоспарлап отырмыз».
Қызмет жолындағы жоғары бастамаларының арқасында, университетіміз Академиялық адалдық лигасының бір бөлігіне айналды. Алтыдан астам Эразмус жобасы іске қосылды, «Sanaly Urpaq» жобалық кеңсесі, коворкинг, инклюзивті білім беру орталығы, академиялық ұтқырлық және интернационалдандыру орталығы, тіркеу кеңсесі және т.б. ашылды. Ол ЖОО ұйымдастырудағы теория мен практиканы үйлесімді үйлестіре алды.
Серік Мәуленұлы оқытушыларға ерекше ілтипат білдірді: «Сіздермен жолығып, кездескеніме қуаныштымын. Өйткені дәл сол жылдар – менің өмірімнің ең жақсы кезеңдерінің бірі. Университеттің бүгінде гүлденіп, дамып келе жатқаны, сіздің арқаларыңызда. Сол кездегі менің бірінші басшы ретіндегі міндетім сіздерге дұрыс жол көрсету болатын. Мен өз алдыма сіздермен бірлесіп сапалы қызмет ету мақсатын қойдым. Бұл еңбек жылдары мен үшін үлкен тәжірибеге айналды».
Бұл күні Серік Өмірбаевқа СҚО білім басқармасы көп жылғы жемісті еңбегі мен білім беру жүйесіндегі сіңірген баға жетпес қызметі үшін Алғыс хатын жіберді. Осындай ризашылықтарын білдіріп, жылы естеліктерімен бөліскендердің қатары аз емес.
