Осыдан 5 жыл бұрын Қозыбаев университетінің серіктесі, «Kazakh medical center PVT» компаниясының директоры Фарух Шейх Үндістаннан алғашқы студенттерді тартқан болатын. Араға бірнеше жыл салып, ЖОО ынтымақтастығы аясында оқу орнына симуляциялық дағдыларды жаттықтыруға арналған 4 тренажер жабдығын сыйға тартты. Ересектер мен балалардың жүрек-өкпе реанимациясына арналған жаңа жабдықтар әкелінді.
Фарух Шейх Медициналық факультеттің студенттерімен кездесті. Оның айтуынша,ең бастысы, әкелінген құралдар студенттердің игілігіне жаратылсын: «Біз Қозыбаев университетімен 5 жыл жұмыс істеп келеміз. Мұнда жалпы 250-ге жуық студент білім алуда. Қазіргі таңда мен осы өңірдің жақсы мүмкіндіктері мен университеттің жарқын болашағын байқап отырмын, сондықтан университетке Үндістаннан әкелінген құрал-жабдықтарды сыйға тарттым. Бұл тренажерларды олар оқу үдерісінде қолданып, жүрек соғысын дұрыс тыңдауды, алғашқы медициналық көмек көрсетуді үйренеді. Сондай-ақ, 19 медициналық пәндерді қамтитын ағылшын тіліндегі кітаптарды әкелдім».
Сонымен қатар, Академиялық мәселелер жөніндегі Басқарма мүшесі Рената Апергенова, алдағы уақытта ынтымақтастық жалғасатынын айтты: «Енді медициналық көмек көрсету дағдыларын үйренуге болатын арнайы қондырғыларды пайдаланып студенттеріміз талаптарға сәйкес бағдарламаны аяқтағаннан кейін алғашқы емтихандарын тапсырады. Әрине серіктестікті одан әрі дамытамыз. Бірлескен ғылыми жобаларды әзірлеу жоспарда бар. Жаңа жабдықтардың арқасында студенттер жаңа дағдыларды меңгереді».
Ең жас факультеттердің бірі-Медициналық факультет. Осы жылы медицина мамандығының алғашқы түлектері түлеп ұшады. Айта кетейік, бүгінде «Жалпы медицина» бағдарламасы бойынша 240-тан аса Үндістан азаматы білім алуда. Биыл 78-і үнді студенттері оқуды тәмамдайды.
