СҚО-ға жұмыс сапары барысында Мемлекет басшысы білім беру, ғылыми-зерттеу қызметімен және ЖОО-ның даму стратегиясымен танысты. Бүгінде мұнда 6 мыңнан астам студент оқиды. Оның ішінде Аризона университетімен қос диплом бағдарламалары бойынша.
Университетте 2 000 студентке арналған және зерттеу жүргізу үшін барлық қажетті құрылғылармен жабдықталған жаңа оқу-зертханалық ғимарат ашылды.
Қасым-Жомарт Тоқаев ұшқышсыз басқарылатын ұшу аппараттарына арналған лабораторияны аралап көрді. Онда студенттер ГИС-технология арқылы жерді қашықтан зондтау деректеріне талдау жасауды үйренеді. Сондай-ақ, Президентке күрделі конфигурация бөлшектерін алудың инновациялық әдістері, симуляциялық оқыту және практикалық дағдылар орталықтары көрсетілді. Ауыл шаруашылығы өнімінің сапасын және оның қауіпсіздігін бағалау зертханасын ұсынды.
Мемлекет басшысы озық халықаралық тәжірибені енгізу және елде шетелдік жоғары оқу орындарының филиалдарын ашу қажеттігін атап өтті.
– Біз жетекші университеттерді елімізде филиалдарын ашу үшін шақырып отырмыз. Мен Ресейдің техникалық университеттерін ынтымақтаса жұмыс істеуге шақырдым. Алматыдағы ҚазҰУ-да физика-техника және Атырауда мұнай-газ салалары бойынша Ресей университеттерінің бөлімшелері ашылды. Жақында Сиань қаласында болдым. Ол жерде де Қытайдың техникалық бағыттағы жоғары оқу орындары өз филиалдарын елімізде ашуына мүдделі екенімізді айттым. Мұның бәрі бізге пайдалы. Өйткені білім халықаралық ынтымақтастыққа жол ашады. Білімде шекара болмайды. Қарыштап дамып кеткен елдер бар. Артта қалып қойған, бірақ озық мемлекеттерді қуып жетуге талпынатын елдер де бар. Сондықтан бұл саланың перспективасы зор. Қазақстан білім саласын дамыту үшін алдыңғы қатарлы елдердің қатарына қосылады деп ойлаймын. Мен сіздерге үлкен үміт артамын, – деді Қасым-Жомарт Тоқаев.
Қозыбаев университетінің Басқарма Төрағасы – Ректоры Ерлан Шұланов ЖОО-ның алдағы жылдарға арналған даму стратегиясын ұсынды: "Біз сіздің тапсырмаларыңызды орындау үшін жұмыс істеп жатырмыз. Атап айтсақ, Аризона университетінің филиалының ашылуы. Біз бұл жобаны іске асырудамыз. Өткен жылдан бастап бізде 150 білім алушы оқуларын бастады. ЖОО-да жаңа ғимарат іске қосылды, 1 500 орындық 4 жатақхана салынуда, бұл студенттердің қолайлылығы үшін маңызды".
Akorda.kz сайтынан материалдары бойынша
