Жаңа оқу жылындағы жаңа серпін
Манаш Қозыбаев атындағы Солтүстік Қазақстан мемлекеттік университетінде ҚР Конституциясының 18 жылдығына арналған «Қазақстан Республикасының Конституциясы – мемлекеттің қалыптасуы мен қоғам нығаюының негізі» тақырыбында аймақтық ғылыми-теориялық конференциясы өткен болатын.
Конференцияға облыстық білім басқармасының бастығы Шолпан Кәрімова, сондай-ақ оқу орнының оқытушылары, студенттері мен қоғамдық ұйымдардың өкілдері қатысты. Алғаш болып сөз сөйлеген университет ректоры Оңдасын Әшімов жиынға қатысушыларды Ата заңымыздың қабылдану күнімен құттықтап, еліміздің негізгі құжатының маңыздылығын тізіп өтті. «Конституция мемлекет пен қоғамның ілгері дамуын қамтамасыз етеді, сондай-ақ қоғам өмірінің аясын заман талабына сай өзгертуге септігін тигізеді» деп атап өтті оқу орны басшысы.
«Нұр Отан» ХДП «Болашақ» филиалы төрағасының бірінші орынбасары Данияр Әбутәліпов Қазақстанда партиялардың құрылуы туралы баяндаса, «Тарих және әлеуметтік-гуманитарлық пәндер» кафедрасының меңгерушісі, тарих ғылымдарының кандидаты Әскер Әбуов Конституцияны Қазақстан азаматтарын біріктіру факторы ретінде қарастырды. Жиында білім ошағының оқытушылары мен студенттері азаматтық лептерін білдіріп жатты. Осылайша жаңа оқу жылының басы білім алушы жастарға ерекше серпін берді. Бүгіндері олар сапалы білім алуға бет алып, оқуға білек сыбана кірісуде.
Жанар Омарова,
М.Қозыбаев атындағы СҚМУ баспасөз орталығының қызметкері