Университетіміздің Агротехнологиялық факультеті мен бұл ЖОО серіктестік қарым-қатынасты бұрыннан қалыптастырған. Қытайлық әріптестеріміздің қолдауымен бізде биотехнология бойынша ғылыми-зерттеу зертханасы ашылды. Картоп шаруашылығы СҚО-да сұранысқа ие сала. Оның белсенді өсуіне климат пен топырақ әсер етеді. Сондықтан бұл зертханада ауруға төзімді сорттар алынады.
Бірлесіп құрылған Агротехнопаркте жұмыс қызу жүріп жатыр. Ол университеттің ауылдық агробиостанциясының базасында орналасқан. Тәжірибелік зерттеулер үшін шағын көлемді ауыл шаруашылығы техникасы сатып алынды, екі жоғары оқу орнының ғалымдары мен білім алушылары жұмысқа тартылады. Бүгінгі сапар барысында декан Шан Вейсин бастаған Қытайдан келген профессорлар отандық және шетелдік селекциялық дақылдарды өсіру бойынша ғылыми зерттеулердің нәтижелерімен танысты.
Айта кетейік, ҚХР-да жыл сайын АФ оқытушылары мен студенттері білім алуда. Сондай-ақ, биыл бізге қытай магистранттары келді. Оқу ордамызға өсімдік және мал шаруашылығы бойынша дәрістермен педагогтар келеді. Бұл өзара тиімді қызметтің бастамасы. Жоспарда - магистратураның бірлескен білім беру бағдарламаларын ашу болмақ.
