Аризона университетімен ынтымақтастықта ашылған Қозыбаев университетінің білім беру бағдарламаларына биыл 490-нан астам студент оқуға түсті. Жаңа оқу жылы салтанатты түрде ҚР ҒЖБ министрі, СҚО әкімінің орынбасары және Аризона университеті өкілдерінің қатысуымен өтті.
«Алғашқы міндетіміз - аймақтық университеттерде шетелдік университеттердің филиалдарын ашу арқылы білім алу үшін қолайлы жағдай жасау. Себебі сапалы халықаралық білім енді біздің Қозыбаев университетінде мүмкін. Осы жылы біз еліміздің 18 облысынан білім алушыларды оқуға қабылдадық. Бұл серіктестіктің арқасында жаңа студенттерді қарсы алуға келдім», - деді министр Саясат Нұрбек.
Ол студенттерді жасанды интеллектті дамыту бойынша Google-мен бірлесіп әзірлеген студенттерге арналған бірегей курспен таныстырды. Сондай-ақ,еліміздегі жоғары білім беру жүйесін дамытудың негізгі векторларына тоқталды. Еркін диалог алаңында студенттер өздерін толғандырған сұрақтарға жауап алып, ұсыныстарын білдірді.
Аризона университетімен қос дипломдық және халықаралық бағдарламаларды жүзеге асыру бойынша ынтымақтастық біздің университетте екінші жыл жүзеге асуда. Ал 2022 жылы оған 150 білім алушы түскен болса, биылдың өзінде бұл көрсеткіш үш жарым есе артты.
Аризона университетінің өкілі Джон Пол Джонс студенттерді оқуға түсулерімен құттықтап, ҒЖБМ, СҚО басшылығына, Қозыбаев университетіне жаһандық қос дипломдық бағдарламаны ашуға мүмкіндік бергені үшін алғысын білдірді: «Өткен жылы бастап, бүгінде кеңейтіп, тереңдетіп отырған ынтымақтастық бұл аймақтың кең ауқымды салалардағы дамуын белсендетті: жастардың білімі мен әлеуметтік дамуы, барлығының игілігі үшін тиімді және тұрақты пайдалану, сондай-ақ экономиканың , мемлекеттік басқару мен азаматтық қоғамдағы проблемалардың негізделген шешімдерін іздеуде үлкен мәнге ие», - деп өз сөзін түйіндеді.
Сондай-ақ, СҚО-ға сапары барысында Ғылым және жоғары білім министрі университеттің жатақханаларымен, оның ішінде салынып жатқан 1200 орындық ғимараттармен танысты.
