Университетімізде өткен «Жайдарман» Республикалық чемпионатында әзілкештер Қызылжар кубогын сарапқа салды. Оздырылған додаға Астанадан, Қостанайдан, облысымыздың Аққайың мен Ақжар аудандарынан және жергілікті жайдарманшылардан құралған 9 команда өнер көрсетіп, көрермен көзайымы болды.
Әзіл кеште құрамалар өздерін еркін тақырыпта 5-7 минутта таныстырып, негізгі алаң кезеңімен бақтарын сынады. Қоғамда көрініс тапқан оқиғалар мен түйткілді мәселелерді астарлы әзіл-қалжыңмен жеткізуге тырысқан командалар екі сағат бойы жоғары деңгейдегі дайындықтарын көрсетті.
Тартысты сайыс нәтижесінде сапалы контент жасауға талпыныс ретінде бағалы сыйлық табысталды. 3 орынға Аққайың ауданы құрамасы лайық деп танылса, 2 орын қаламыздың намысын қорғаған «Академия ұландары»-на бұйырды. Бұл жекпе-жекте астарлы әзілдерімен Қозыбаев университетінің «Қызылжар» жайдарманшылары жеңіп теледидар ұтып алды!
Жеңіс ұранымен, енді біздің құрама облысымыздың және ЖОО-ның абыройын Көкшетауда өтетін Республикалық Солтүстік Nomad финалында қорғайды. Сәттілік!
