Қозыбаев университетінің 22 қызметкері мен оқытушысы «Мамандығым – болашағым» жобасы бойынша оқудан өтті. Енді олар өнеркәсіптің негізгі салаларының мамандарымен бірлесіп, өңірлік кадрлар қажеттілігі картасын әзірлеуге кіріседі. Бұл облысымыздағы болашағы зор мамандықтарды анықтауға, солтүстікқазақстандық еңбек нарығындағы өзгерістерді болжауға және соның негізінде студенттердің Бб бағдарламаларын жаңартуға мүмкіндік береді. Қатысушылар 5 күн бойы форсайттық зерттеу әдістемесі бойынша курс оқыды. Олардың жұмысы екі бағытта құрылды.
Жинақтаушы аналитик ретінде қатысқан «География және экология» кафедрасының аға оқытушысы Асель Бектемирова жоба барысында алған тәжірибесімен бөлісті: «Бір жұманың ішінде екі топта: «Модератор» және «Жинақтаушы аналитик» болып жұмыс атқардық. Оқу барысында тақырыптар таңдалды, оның ішінде, медицина, ауыл шаруашылығы, құрылыс, машина жасау саласы қозғалды. Енді кадрлар қажеттілігінің өңірлік картасы негізінде, қолданыстағы білім беру бағдарламаларына өзгерістер енгізуді ұсына аламыз.Өз басым форсайт-сессиясында барлық берілген ақпаратты жинақтап,бір жүйе құрдым. Соңында есеп жаздық. Нәтижесинде зерттеу әдістемесін әзірледік». Қызметкерлерге семинар соңында сертификаттар табысталды.
