Қозыбаев университетінде еліміздің солтүстігінде жүргізген кешенді ғылыми зерттеулердің алғашқы нәтижелеріне арналған отырысы өтті. Экспедиция ҚР ҒЖБМ Ғылым комитетінің «Мәдени-тарихи үрдіс контекстіндегі Солтүстік Қазақстан: тас дәуірінен бастап этнографиялық бүгінге дейін» жобасы аясында жүргізілді. Зерттеудің негізгі аймағына СҚО, Павлодар және Қостанай облыстары кірді.
Ә.Марғұлан атындағы Археология институтының жетекші ғылыми қызметкері, Жанболат Өтебаевтың айтуынша, Қазақстан археологиясындағы жаңа бағыт анықталып, зерттелді: «Бұл-Этноархеологиялық зерттеулер. Осы бағыт бойынша ру-тайпалардың көші-қон қоныстары, қыстақтары, қорымдары мен мешіттері қарастырылды. Нәтижесінде 50-ден аса тастан жасалған үйлер, 3 көне мешіт пен 3 қорым анықталды. Сонымен қатар өңірімізде мезолит-неолиттік «Виноградовка 2 тұрағы», ерте темір дәуірінің «Березовский» және ортағасырлық «Симоновка 11» кешені зерттелді. Жалпы экспедициялар Солтүстік Қазақстан облысының 7 облысында өтті».
Барлау-іздестіру жұмыстарына 11 ғылыми топпен МЖҒФ студенттері және оқытушылары атсалысты. Қазба жұмыстары барысында жаңадан 300-ге жуық тарихи- мәдени ескерткіштер құжатталды.
