Қызылжар өңірінде қазақ журналистикасының дамуына сүбелі үлес қосқан жерлесіміз Бақыт Мұстафин ортамызда жүрсе биыл 86 жасқа толар еді. Университетте ұлағаты мол ұстаздың өмірі мен шығармашылығына арналған «Сөз-мұхиттан маржан сүзген қаламгер...» атты кеш өтті.Журналист-жазушы ұзақ жылдар бойы Солтүстік Қазақстанның әдеби-публицистикалық шығармашылығын дамытуға белсене араласып, ұйымдастырушы ретінде жемісті еңбек еткен.
Ол қазақ тілінің өрісін кеңейтіп, беделін арттыруға зор үлес қосты.Бақыт Мұстафиннің «Жәлел Қизатов», «Жайнаған жер», «Құрманғали Сұрағанов» және т.б. очерктер жинақтары, балаларға арналған «Тәтті сәбіз» кітабы жарық көрді.
Бақыт Мүталлапұлы– Журналистер одағы сыйлығының лауреаты, «Достық» орденінің иегері.Еңбек жолын облыстық «Ленин туы» газетінде бастаған. Ал «Солтүстік Қазақстан» баспасында журналистік қызметтің барлық деңгейінен өтті: жауапты хатшы, редактордың орынбасары, бас редактор болды. 2005-2006 ж.ж университетіміздің журналистика кафедрасында оқытушы болып қызмет атқарды.
Кеште өз пікірлерін білдіріп, естелік лебіздерімен бөліскендер қатары толарлық: «Бақыт ағамен бірге әріптес болып үлгердік. Бүгінгі күні сұхбаттасып, әңгімелерін тыңдағаныма қуанамын. Сөз өнері әлемінде өз орнын тапқан Бақыт Мұстафин сияқты адамдардың шығармашылық шеберлігін үйренуге, түйсінуге талпына білген адамға үлкен тағылымдық мектеп екендігі сөзсіз»,-деп Басқарма Төрағасы - Ректор кеңесшісі Жанар Таласпаева бөлісті.
Артында өшпес мұра қалдырған қаламгер Бақыт Мұстафиннің құрметіне туған-туыстары мен жақындары, замандастары, университет оқытушылары мен студенттері, облыс әкімдігінің қызметкерлері, қоғам қайраткерлері жиналды.
