Университет қабырғасында режиссер Сламбек Тәуекелдің тарихи қасірет пен шынайы адамгершілік туралы түсірілген өткір драмасы талқыланды. Алғыс айту күні қарсаңында «Қазақстан халқы Ассамблеясы» кафедрасы студенттерге кинодәріс форматында бейнефильм ұсынды. Экранда фильмнен үзінділер көрсетіліп, Қазақстанға жер аударған түрлі ұлт өкілдері отбасылық шежірелерінің сәттерімен бөлісіп, өз пікірлерін айтып, көрсетілген көмек үшін ризашылықтарын білдірді.
«Жерұйық» – қатыгез сынақтар дәуіріндегі ұлтаралық бірлік туралы тарихи драма. Жұттан кейін басқа түскен қиын заманға қарамастан, шын көңілімен ілтипат көрсетіп, қайғысына ортақ болғаны үшін басқа ұлыстардың қазақ халқына деген алғысы ретінде түсірілген фильм. Қасіретті жылдардың ауыр жағдайында достықтың қалыптасқандығын суреттейді. Осылайша өзге ұлт өкілдері осы жерден жаңа қоныс пен нағыз отандарын тапты.
ҚХА кафедрасының меңгерушісі Людмила Гривенная өзі мүше болып табылатын Саяси қуғын-сүргін құрбандарын толық ақтау жөніндегі Мемлекеттік комиссияның жұмысымен таныстырды. Мемлекеттік комиссияның іс-шараларына белсенді қатысқан студенттерге алғыс хаттар табысталды.
