ЖОО-да СҚО Ішкі істер департаменті қызметкерлерінің қатысуымен алаяқтықтың алдын алу бойынша іс-шара өтті. Оқытушылар мен қызметкерлерге интернет-алаяқтардың әрекеттеріне қатысты негізгі шаралар айтылды.
«Соңғы 5 жылда әлеуметтік желідегі қылмыс саны артты. СҚО-да өткен жылы олардың 780-і тіркелген. Ең көп таралған түрі-интернет алаяқтық. Құқық бұзушылықтың осы түріне қарсы іс– қимыл жасау мақсатында Петропавл қ. ПБ базасында «Киберпол» арнайы бөлімшесі құрылды. Біз халықпен профилактикалық жұмысқа ерекше назар аударамыз. Өткен жылы статистика бойынша білім беру мекемелерінің қызметкерлеріне қатысты 50 факт тіркелген», – деп атап өтті СҚО ПД Криминалдық полиция басқармасының аса маңызды істер жөніндегі аға жедел уәкілі Виталий Подчернин.
Университетіміздің ұжымында интернет-қылмыскерлердің алаяқ іс-қимыл әрекеттері де кездеседі. Полиция қызметкерлері хабарлағандай, егер белгісіз нөмірден ақша аударуыңызды сұрап немесе «қиындыққа тап болған жақын адамнан» қоңырау түссе, әңгімені дереу тоқтату қажет. Полицияға, банкке хабарласып, анық-қанығын білу үшін таныстарыңызға қайта қоңырау шалыңыз. Бұл ақпарат зиянды сілтеме бойынша өтуді, дауыс беруді талап ететін хабарламаларға да қатысты. Ең бастысы – жеке деректерді ешкімге таратпау. Сондай-ақ, қатысушыларға алаяқтық схемаларды нақты көрсететін бейнероликтер көрсетіліп, профилактикалық жұмыс жүргізілді.
