Қозыбаев университетіне Хорватия Республикасының ҚР-дағы Төтенше және Өкілетті Елшісі Рефик Шабанұлы келді. Ол Хорватияда дәстүрлі түрде дамыған фармация, туризм, экологиялық таза ауыл шаруашылығы, спорт салалары туралы бөлісті. Елшінің айтуынша, ЖОО-да дәл осы бағыттар бойынша білім беру бағдарламаларының болуы қуантады. Бұл салалар екіжақты ынтымақтастықтың ортақ нүктесі бола алады.
«Біздің оқу ордамызда Агротехнологиялық ғылымдар мектебі, 2018 жылдан бастап медицина факультеті ашылды. ЖОО Аризона университетімен қос дипломды бағдарламаларды іске асыру, сондай-ақ, агро саласында Қытайдан келген серіктестермен ғылыми және білім беру ынтымақтастығы бойынша табысты әріптестік тәжірибеге ие», – деді Басқарма Төрағасы- Ректор м.а. Рената Апергенова.
Қонаққа білім ордамыздың академиялық және ғылыми жұмысы туралы ғана емес, сонымен қатар, оқудан тыс өмір, инфрақұрылым, дамудың негізгі векторлары туралы айтылды, мұнда транспаренттілік, диалог пен жаңа жобаларға деген ашықтық, Қозыбаев университетінің, солтүстік өңірдегі мықты жоғары оқу орындарының бірі болып қалуына мүмкіндік береді.
